وفاقی وزیر خزانہ سینیٹر اسحاق ڈاردااٹھویں سارک وزیر خزانہ اجلاس دے افتتاحی سیشن توں خطاب

اسلام آباد ۔ 26 اگست (اے پی پی) وفاقی وزیر خزانہ سینیٹر اسحاق ڈار امید ظاہر کیتی ہے جو علاقائی ترقی تے خطے دے لوکاں کوں بھک تے غربت اتے ناخواندگی جیہوجے مسلیں توں نجات ڈیواونڑ سانگے جنوبی ایشیا ئی اقتصادی یونین دی تشکیل دا خواب وختی پورا تھیسی ویسی ایں سلسلے اچ سارک ملکاں ولوں سانجھے اہداف تے یکسوئی دے نال توجہ ڈیونڑیں ہوسی ۔او جمعے کوں اتھاں اٹھویں سارک وزیر خزانہ کانفرنس دے افتتاحی سیشن توں خطاب کریندے پے ہن ۔ وزیر اعظم محمد نواز شریف افتتاحی تقریب دے مہمان خصوصی ہن جڈاں جو سارک دے سیکرٹری جنرل ارجن بہادر تھاپا، سارک دے ممبرملکاں دے خزانے دے وزیراں تے وفاقی وزیراں تے سارک ملکاں دے سیکر ٹریز خزانہہ وی ایں موقع تے موجود ہن ۔ وزیر خزانہ سارک ملکاں دے مندوبین دا خیرمقدم کریندے ہوئیں آکھیا ہے جو جنوبی ایشیا دے خطے اچ عوام دی ترقی دیاں ضرورتاں کوں پورا کرنڑ سانگے ودھ سارے موقع تے صلاحیت موجود ہنے ،ایں سلسلے اچ سانجھیاں حکمت عملیاں تے سارک ملکاں وچال لوکاں کوں اقتصادی تے سماجی چنگائی سانگے وسائل دے استعمال تے توجہ ڈیونڑ دی ضرورت ہے ۔انہاں سارک وزیر خزانہ دے اٹھویں اجلاس دی میزبانی تے حکومت پاکستان دی تعریف کریندے ہوئیں آکھیا جو افتتاحی سیشن اچ وزیر اعظم نواز شریف دی شرکت ایں تنظیم دے نال پاکستان دی وابستگی تے قیادت دے عزم دی عکاس ہے ۔