پاکستان تے چین دا ڈوہیں ملکاں وچال سانجھے مفاد اچ سارے شعبہ جات تے اقوام متحدہ سمیت کثیر الجہتی فورمز تے سانجھے تعاون کوں مزید تقویت ڈیونڑ تے اتفاق ،پاک چین سٹریٹجک ڈائیلاگ دے ستویں دوردے دوران ڈو پاسے تعلقات دے سارے پہلوواں تے تفصیلی گالھ مہاڑ کیتی گی ،دفتر خارجہ

اسلام آباد ۔ 23 اگست (اے پی پی) پاکستان اتے چین ڈوہیں ملکاں دے سانجھے مفاد اچ سارے شعبہ جات تے اقوام متحدہ سمیت کثیر الجہتی فورمز تے اپنڑے تعاون کوں مزید تقویت ڈیونڑ تے اتفاق کیتا ہے اے اتفاق پاکستان تے چین وچال گزریل ڈینھ بیجنگ اچ منعقد سٹریٹجک ڈائیلاگ دے ستویں دورے دے دوران پاتا گیا ۔خارجہ سیکر ٹری اعزاز احمد چوہدری پاکستان دے وفد جڈاں جو نائب وزیر کارجہ امور برائے ایشیاءتے قونصلر امور کونگ چیان ژوچین دے وفد دی قیادت کیتی ۔ترجمان دفتر خارجہ ولوں منگل کوں جاری بیان دے مطابق ڈوہیں پاسے دے تعلقات دے سارے پہلوواں دا تفصیلی جائزہ گھد ا گیا ۔جیں اچ پاک چین اقتصادی راہداری، اقتصادی تعاون، دفاع، انسداد دہشت گردی ،ایس سی او، ثقافت، تعلیم اتے عوامی سطح تے رابطے شامل ہن۔ ڈوہیں پاسے ڈو ملکاں دے سانجھے مفاد اچ سارے شعبیں اچ اپنڑے تعاون کوں مزید تقویت ڈیونڑ تے اتفاق کیتا۔ اعزاز چوہدری اپنڑے ہم منصب کوں مقبوضہ کشمیر اچ سنگین انسانی صورتحال اتے انسانی حقوق کوں جاری خلاف ورزیاں بارے ڈسایا ۔ انہاںامید ظاہر کیتی جو بین الاقوامی برادری مقبوضہ وادی اچ انسانی حقوق دی سنگین خلاف ورزیاں دے خاتمے سانگے بھارت تے دباﺅ پاونڑ اچ اپنڑاں کردار ادا کرے۔ خارجہ سیکرٹری اعزاز احمد چوہدری چین دے ڈو ڈینھ دے سرکاری دورے دے دوران چینی وزیر خارجہ وانگ ژی نال بیجنگ اچ ملاقات وی کیتی۔ بیجنگ اچ قیام دے دوران او پاکستان دی خارجہ پالیسی بارے ممتاز تھنک ٹینک، چائنہ انسٹی ٹیوٹ آف انٹرنیشنل آفیئرز اچ خطاب وی کریسن۔