اسلام آباد ۔ 4 اگست (اے پی پی) وزیراعظم محمد نواز شریف آکھیا جو پاکستان دہشت گردی ،بدعنوانی اتے منظم جرائم نال نبڑنڑ سانگے سارک دے رکن ملکاں نال رل تے کم کرنڑ سانگے بھرپور عزم رکھیندے،آپریشن ضرب عضب اتے نیشنل ایکشن پلان تے مئوثر عملدرآمد دے ذریعے دہشت گردی دے خلاف شاندار کامیابیاں حاصل کیتن،خطہ دی ترقی اتے خوشحالی سانگے مواصلاتی رابطہ ناگزیر اے۔انہاں اے گالھ خمیس کوں ستواں سارک وزراء داخلہ کانفرنس دی افتتاحی نشست نال خطاب کریندیں ہوئیں آکھی۔وزیر اعظم آکھیا جو اے وژن ایں سال نومبر اچ پاکستان دی میزبانی اچ تھیونڑ آلی 19ویں سارک سمٹ دے ایجنڈے اچ معاون تھیسی۔وزیر اعظم سارک وزراء داخلہ کوں ڈسایا جو قومی سطح تے پاکستان آپریشن ضرب عضب اتے نیشنل ایکشن پلان تے مئوثرعملدرآمد نال دہشت گردی دے خلاف شاندار کامیابیاں گھدن ،اے کامیابیاں آپنڑی سرزمین توں دہشت گردی دی لعنت دے خاتمے سانگے حکومت دے عزم دی غماز ہن ۔وزیر اعظم آکھیا جو چیلنجاں دے باوجود سارک جنوبی ایشیاء اچ علاقائی ہم آہنگی دے مقصد دے حصول اچ قابل تحسین کردار ادار کیتے جڈانجو تنظیم کوں ودھ مئوثر اتے فعال بنڑاونڑ سانگے حکومتاں اتے سارک اداریاں سانگے ضروری اے جو او تنظیم کوں ودھ مفید بنڑاونڑ سانگے مربوط کوششاں کرن ۔ایں توں پہلے سارک دے سیکرٹری جنرل ارجن بہادر تھاپا آپنڑے کلمات اچ آکھیا جو ناکوٹکس،دہشت گردی ،سائبرکرائم اتے بئے بین الاقوامی جرائم نال نبڑنڑ سانگے موثر اقدامات دی لوڑھ اے۔انہاں آکھیا جو سارک ہر قسم دی دہشت گردی دی مذمت کریندے ۔
