چارفریقی گیس پائپ لائن منصوبہ سارے خطے کیتے بہوں اہمیت رکھیندے ، وزیراعظم محمد نواز شریف

اسلام آباد ۔ 3 اگست (اے پی پی) وزیراعظم محمد نواز شریف آکھے جو ترکمانستان، افغانستان، پاکستان، بھارت گیس پائپ لائن (تاپی) سارے خطے کیتے بہوں اہمیت رکھیندی ہے ۔ منصوبے دے تکھے پورے تھیونڑ نال توانائی دی سیکورٹی اتے علاقائی خوشحالی دے سانجھے مقاصد دے حصول اچ مدد ملسی ۔ اے گالہیں انہاں بدھ کوںتھاں وزیراعظم ہائوس اچ ترکمانستان دی مجلس دی چیئرپرسن اکاجا نور بردییف دی قیادت اچ وفد نال گالھ مہاڑ اچ آکھیاں۔ وزیراعظم آکھیا جو پاکستان دی گیس دی لوڑ کوں پوراکرنڑ دے علاوہ اے منصوبہ علاقے کوں اقتصادی اتے رسیاسی لحاظ نال آپس اچ ملاونڑ اچ وی مدد ڈیسی ۔ وزیراعظم آکھیا جو پاکستان اتے ترکمانستان وچال پارلیمانی وفوددے وقتاً فوقتاً دوریاں نال ڈوہائیں ملکاں اچ جمہوریت دے استحکام اچ مدد ملسی ۔ انہاں آکھیا جو پاکستان اتے ترکمانستان دے دوستانہ تعلقات ہن جڈانجو ڈوطرفہ تعلقات دا دائرہ اتے خاص طور تے اقتصادی رابطیاں کوں بیا ودھاونڑ دی ودھ ساری گنجائش موجود ہے۔ انہاں آکھیا جو اساں ارکان پارلیمنٹ پارلیمانی کمیٹیاں اتے پارلیمانی دوستی گروپاں وچال بئے رابطے چاہندے ہئیں۔ وزیراعظم ترکمانستان دی آزادی دی 25 ویں سالگرہ تے ترکمانستان دے صدر قربان گلی بردی محمدوف اتے ترکمانستان دے لوکیں کوں دلی طور تے مبارخ ڈتی ہے ۔ ترکمانستان دے مجلس دی چیئرپرسن پاکستان اچ انہاں دے وفد دا پرتپاک استقبال کرنڑ تے وزیراعظم دا شکریہ ادا کیتا اتے ترکمانستان دے صدر قربان گلی بردی محمدوف ولوں وزیراعظم محمد نواز شریف دے کامیاب آپریشن تے مبارخ ڈتی ۔ ترکمانستان دے توانائی دے نائب وزیر تاج محمد غلام محمدی دوف ایں موقعے تے آکھیا جو تاپی گیس پائپ لائن منصوبہ دسمبر 2019ء تئیں پورا تھی ویسی ۔ انہاں آکھیا جو 15 کلومیٹر پائپ لائن پہلے ہی وچھائی گئی ہے جڈانجو 80 کلومیٹر دی پائپ لائن تے کم ایں ویلھے جاری ہے ۔