اسلام آباد ۔ 15 ستمبر (اے پی پی) اسپیکر قومی اسمبلی سردار ایاز صادق آپنڑیں چینی ہم منصب ژانگ ڈی ژیانگ نال بیجنگ اچ ملاقات کیتی۔ خمیس کوں جاری کیتے گئے بیان اچ آکھیا گئے جو ڈوہائیں اگوانڑاں ایں امر دا اعادہ کیتے جو چین پاکستان اقتصادی راہداری منصوبہ دے تحت سارے منصوبیاں کوں ڈتے گئے ویلھے اچ پورا کیتا ویسی ۔ انہاں ایں منصوبے کوں ڈوہائیں ملکاں دے علاوہ خطے دے باقی علاقیاں کیتے وی فیدہ مند منصوبہ قرارڈتا۔ اسپیکر سردار ایاز صادق آکھیا جو چین ہک عظیم ملک ہے اتے پاکستان دا آزمودہ دوست ہے۔ اساکوں ایںگالھ تے فخر ہے جو اے تعلق اتے رشتہ گزریل گئی نسلاں تے محیط ہے ۔انہاں امید ظاہر کیتی جو ڈوہائیں ملکاں کوں نیڑے گھن آونڑ کیتے متواتر پارلیمانی وفود دا تبادلہ اتے باہمی عوامی رابطیاں نال کئی ڈھاکیاں توں جاری تریخی تعلق داری مزید مضبوط تھیسی ۔ انہاں چین پاکستان اقتصادی راہداری اتے پاک چین تعلقات اچ پاکستان دیا ںسیاسی طاقتاں دی ہم آہنگی کوں وی اجاگر کیتا۔ سردار ایاز صادق آپنڑیں چینی ہم منصب کوں مقبوضہ وادی کشمیر اچ انسانیت سوز سلوک بارے وی ڈسایا اتے ایں گالھ تے زور ڈتا جو طویل عرصہ توں جاری ایں مسئلے کوں پر امن طریقے نال اقوام متحدہ دیاں قرارداں اتے کشمیری عوام دیاں امنگاں دے عین مطابق حل کیتا ونجے ۔
