بری فوج دے سربراہ جنرل راحیل شریف داقومی انسداد دہشت گردی سینٹر پبی دے دورہ دے موقع تے خطاب

راولپنڈی ۔ 23 ستمبر (اے پی پی)بری فوج دے سربراہ جنرل راحیل شریف آکھیا جو اساڈی بہادر مسلح فوج ہر قسم دے خطریاں نال نبڑنڑ دی بھرپور صلاحیت رکھیندی اے،پوری قوم دی حمایت نال اساں ہر قیمت تے مادر وطن دے چپے چپے دا دفاع کریسوں،پاکستان ہک دہائی توں دہشت گردی دا شکار رہیے،قوم دی سانجھی کوششاں نال دہشت گردی تے قابو پا گھد اگئے۔او قومی انسداد دہشت گردی سینٹر پبی دے دورہ دے موقع تے خطاب کریندے پئے ہن ۔ پاک فوج دے شعبہ تعلقات عامہ (آئی ایس پی آر) دے مطابق جمعہ کوں بری فوج دے سربراہ جنرل راحیل شریف قومی انسداد دہشت گردی مرکز(این سی ٹی سی) پبی،کھاریاںدا دورہ کیتا۔جتھاں انہاں ملکی اتے غیر ملکی فوج دی تربیت سانگے ودھدی ہوئی منگ دے مطابق بنیادی ڈھانچے کوں اپ گریڈ کرنڑ اتے نویں سہولتاں تے مشتمل نویں تربیتی مرکز دا افتتاح کیتا۔نویں تربیتی مرکز دے افتتاح نال ملکی اتے غیر ملکی فوج کوں انسداد دہشت گردی دی زیادہ تربیت ڈتی ونج سگسی۔سٹرائیک کور دے کمانڈرلیفٹیننٹ جنرل عمر فاروق درانی ،آرمی چیف کوں ایں تربیتی مرکز بارے بریفنگ ڈیندیں ہوئیں آکھیا جو ایں تربیتی مرکز اچ ہنڑ تئیں مسلح فوج دے 2لکھ31ہزار افسراں اتے نینگراں اتے پولیس تے سول آرمڈ فورسز دے 3483افسر اتے نینگر ایں مرکز اچ انسداد دہشت گردی دی تربیت گھن چکین ۔تقریب نال خطاب کریندیں ہوئیں جنرل راحیل شریف جدید ترین سہولتاں نال آراستی قومی انسداد دہشت گردی مرکز کوں بہترین انداز اچ معیاری تربیت دے ذریعے استعداد کار اچ ودھارے دی اپروچ نال تربیت ڈیونڑ دی تعریف کیتی۔افسراں اتے نینگراں نال خطاب کریندیں ہوئیں جنرل راحیل شریف آکھیا جو اساڈی بہادر مسلح فوج پوری قوم دی حمایت نال ہر قسم دے خطرے دا بھرپور مقابلہ کرنڑ اتے ملک دے ہک ہج انچ دا دفاع کرنڑ دی بھرپور صلاحیت رکھیندی اے،خواہ اوندی کوئی قیمت وی ہوے۔