حکومتاں اتے نجی شعبہ شرح خواندگی وچ ودھارے، پرامن ‘ انصاف پسند ‘ پائیدار اتے اجتماعی معاشراں سانگے رل مل تے کم کرن ، بان کی مون

اقوام متحدہ۔ 08 ستمبر (اے پی پی) اقوام متحدہ دے سیکرٹری جنرل بان کی مون پوری دنےا دے ملکاں دیاں حکومتاں اتے نجی شعبہ کوں آکھیا ہے جو ا وہ شرح خواندگی وچ ودھارے اتے پرامن ‘ انصاف پسند ‘ پائیدار اتے اجتماعی معاشراں سانگے رل مل تے کم کرین ۔ عالمی یوم شرح خواندگی دے موقع تے اپنڑے پیغام وچ بان کی مون آکھیا جو جاری سال پائیدار ترقی دے اہداف سانگے جدوجہد داآغازتھی گئے۔ اتے ایہ اہداف پوری دنیا دے لوکاں ،اساڈی زمین، شراکت اتے امن سانگے ایکشن پلان ہن۔ انہاں آکھیا جو شرح خواندگی وچ ودھارا ‘ پائیدار ترقی دے اہداف 2030ءدا مرکزی نکتہ ہے۔ ایہ انسانی حقوق ‘ صنفی مساوات اتے پائیدار معاشراں دی بنیاد ہے۔ ایہ غربت مکاونڑاتے پوری دنیا وچ وسنڑ آلے لوکیں دی خوشحالی سانگے ناگزیر ہے۔ ایہا وجہ ہے جو پائیدار ترقی دے اہداف 2030ءوچ ہر بندے دی معیاری تعلیم تئیں رسائی کوں یقینی بناونڑ تے خصوصی توجہ ڈتی گئی ہے ۔ اگرچہ گزریل پنج عشراں دے دوران شرح خواندگی وچ ودھارے سانگے کافی پیش رفت تھئی لیکن ایں حوالے نال وی بہوں کجھ کرنڑ باقی ہے ۔ واضح رہوے جو اقوام متحدہ دی تعلیمی ‘ سائنس اتے ثقافتی تنظیم (یونیسکو) اج توں 50 سال پہلے 1966ءوچ 8 ستمبر کوں شرح خواندگی دے عالمی ڈینھ دے طور تے مناونڑ دا اعلان کیتا ہا ۔ یونیسکو ولوں جاری ہک بیان وچ آکھیا گئے جو جاری سال عالمی یوم خواندگی دے موقع تے گزریل ادھی صدی دے دوران شرح خواندگی وچ ودھارے دیاں کوششاں کوں اجاگر کرنڑ دا فیصلہ کیتا گئے۔