اسلام آباد ۔ 18 ستمبر (اے پی پی) حکومتِ پاکستان سعودی عرب اچ پھسے ہوئے پاکستانی مزدوراں کوں پیش آونڑآلیاں مسلیاں دے حل کیتے ہر ممکن اقدامات کریندی پئی ہے ، وزیراعظم دی ہدایات تے وفاقی وزیر برائے سمندر پار پاکستانیز و ترقی وسائل پیر سید صدرالدین شاہ راشدی دی سربراہی اچ ہک اعلی سطحی وفد سعودی عرب دا دورہ کیتاتانجو سعودی عرب اچ پھسے ہوئے پاکستانی مزدوراں دے مسلیاں بارے براہ راست خبر گھدی ونجے اتے انہاں دی مدد کیتی ونجے ۔ ایں دورے دے دوران پاکستانی مزدوراں کوں پیش آونڑآلیاں مسلیاں کوں متعلقہ سعودی حکام دے نال اعلیٰ سطح تے چاتا گئے ۔ سعودی وزیر محنت وفد کوں یقین ڈیوایا جو پاکستانی مزدوراں نال سعودی واسیاں دی طرح دا سلوک کیتا ویندے اتے انہاں کوں ہر طرح دا تعاون ڈتا ویندے ۔ انہاں دے اقامے دی فیس توں بغیر تجدید کرڈتی گئی ہے اتے انہاں کوں مفت خوراک اتے دوائیاں پجایاں ویندیاں پن ۔ سعودی وزیر ڈسایا جو مالی اوکھ پاروں کجھ نجی تعمیراتی کمپنیاں آپنڑیں مزدوراں کوں تنخواہیں ڈیونڑ توں قاصر ہن ۔ متاثرہ مزدوراں اچ پاکستان دے علاوہ بئے ملکاں بشمول بھارت، بنگلہ دیش، سری لنکا، ویتنام، شام، یمن اتے فلپائن دے واسی شامل ہن ۔ انہاں آکھیا جو متاثرہ مزدورا ںدیاں تنخواہیں اتے بئے واجبات دی ادائیگی عدالتاں دے ذریعے عمل اچ گھن آئی ویسی اتے عدالتاں کوں ایں طرح دے مقدمیاں کوں تکھے نبیڑنڑ بارے آگاہ کرڈ تا گئے ۔ واضح ہووے جو وزیراعظم پاکستان ایں مسئلے دا فوری طور تے نوٹس گھندے ہوئیں پاکستان بیت المال کوں ہدایات جاری کیتیاں ہن جو متاثرہ مزدوراں دے ٹبراں کوں پیش آونڑآلے مسلیاں اچ گھٹکی سانگے 50 ہزار روپے فی ٹبر جاری کرنڑ دی ہدایت کیتی ہئی ۔
