سینیٹ اچ صدرمملکت دے پارلیان دے سانجھے اجلاس نال خطاب تے بحث اچ حصہ گھندے ہوئیں ارکان دا اظہارخیال

اسلام آباد ۔9ستمبر(اے پی پی) سینٹ دے ارکان آکھیا جو ملک اچ امن و امان دے قیام کیتے آپریشن ضرب عضب دیاں کامیابیاں قابل تحسین ہن ، مسلح افواج دے جواناں اتے افسراں ماء دھرتی دے تحفظ کیتے جاناں دا نذرانہ پیش کریندے پئے ہن ، امان وامان دی صورتحال چنگی تھیندی پئی ہے ، جیندے نال اقتصادی ترقی دی رفتار بئی تکھی تھیسی ۔ صدر مملکت پارلیمنٹ دے سانجھے اجلاس نال خطاب اچ حکومت کیتے ہک سمت متعین کیتی ہے’ صدر مملکت دی تقریر اچ چاتے گئے اہم نکات تے عمل کرنڑ نال لوکیں دا معیار زندگی بہتر بنڑاونڑ اتے ملک مسلیاں تے تکھے حل اچ مدد ملسی ۔ جمعے کوں پارلیمنٹ دے سانجھے اجلاس نال صدر مملکت دے خطاب تے بحث اچ حصہ گھندے ہوئیں سینیٹر طاہر حسین مشہدی آکھیا جو صدر مملکت آپنڑیں خطاب اچ آپنڑاں وژن واضح کیتے اتے حکومت کیتے اگوں دی سمت متعین کیتی ہے۔ انہاں آکھیاجو ایں ویلھے پاکستان اچ امن و امان دی صورتحال بہتر بنڑاونڑ کیتے آپریشن ضرب عضب کامیابی نال اگوں ٹردا پئے ، بجلی دی صورتحال بہتر بنڑاونڑ اچ وی بئے اقدامات کرنڑ دی لوڑ ہے ۔ سینیٹر جاوید عباسی آکھیاجو صدر مملکت دا خطاب بہوں جامع اتے متوازن ہئی ۔ انہاں ملک کوں درپیش اندرونی اتے بیرونی چیلنجاں دا احاطہ کیتا اتے پاکستان دی معیشت تے وی گالھ کیتی ہے ۔ انہاں آکھیا جو صدر مملکت آپنڑیں خطاب اچ ہک پالیسی متعین کیتی ہے جیندے تے عمل کرنڑ دی لوڑ ہے ۔ انہاں معاشی معاشی شعبے اچ حکومت دیاں کامیابیاں کوں بھرپور طریقے نال سرہایا۔ سینیٹر لیفٹیننٹ جنرل (ر) عبدالقیوم آکھیاجو صدر مملکت آپنڑیں خطاب اچ سارے شعبیاں دا احاطہ کیتا،انہاں گورننس اتے معیشت دے معاملیاں تے وی گالھ کیتی ہے ۔ انہاں آکھیا جو فاٹا اصلاحا ت اتے انتخابی اصلاحات دے نا ل نال عدالتی اصلاحات دی وی لوڑ ہے تانجو مقدمیاں کوں تکھے نبیڑیا ونج سگے ۔ افغان پناہ گزیناں دی واپسی دا عمل تیز تھیونڑاں چاہیدے ، مردم شماری قوم دی ترقی کیتے بہوں لازمی ہے ۔ مردم شماری کیتے صوبیاں دے تعاون نال اگوں ودہنڑاں ہوسی ۔ اے لازمی کائنی جو سارے ملک اچ ہکو ویلھے مردم شماری کروائی ونجے ۔ایں کوں مختلف درجات اچ ونڈ تے وی مردم شماری کروائی ونج سگدی ہے ۔ مردم شماری نال ملکی وسائل کوں برابر دے انداز اچ ونڈیا ویسی ۔ سینیٹر نعمان وزیر آکھیا جو صدر مملکت دا پارلیمنٹ دے مشترکہ اجلاس نال پارلیمانی سال دے شروع تھیونڑ تے خطاب سارے سال کیتے حکومت کیتے ہک سمت دا تعین کریندے ۔ انہاں آکھیا جو چین پاکستان اقتصادی راہداری منصوبے نال سارے ملک دے لوکیں کوں فیدہ ڈیونڑاں چاہیدے ۔ بیرسٹر محمد علی سیف آکھیا جو ہر ملک دا سربراہ نویں پارلیمانی سال دے شروع تھیونڑ تے خطاب کریندے اتے ایں خطاب اچ آندے سال کیتے حکومتی پالیسیاں بارے رہنمائی ڈتی ویندی ہے ۔