صدر مملکت ممنون حسین ترک لینڈ فورس دے سربراہ جنرل صالح ذکی چولاک کوں نشان امتیاز (ملٹری) عطا کیتا ایوان صدر اچ پروقار تقریب اچ آرمی چیف ، سیکرٹری دفاع، ترک سفیر تے بئے اعلیٰ حکام شرکت کیتی

اسلام آباد ۔ 21 ستمبر (اے پی پی) صدر مملکت ممنون حسین ترک لینڈ فورس دے سربراہ جنرل صالح ذکی چولاک کوں بدھ کوں ایوان صدر اچ ہک پر وقار تقریب اچ اعلیٰ فوجی اعزاز نشان امتیاز (ملٹری) عطا کیتا ہے۔ انہاں کوں اے اعزاز پاکستان اتے ترک فورسز وچال تعاون اچ ودھارے سانگے غیر معمولی خذمتاں اچ ڈتا گیا۔ تقریب اچ آرمی چیف جنرل راحیل شریف، سیکرٹری دفاع، پاکستان اچ تعینات ترکی دے سفیر صادق بابر گرگن دے علاوہ بئے اعلیٰ حکام شرکت کیتی۔ ایں موقع تے صدر مملکت آکھیا جو پاکستان اتے ترکی وچال نیڑے تے برادرانہ تعلقات ہن اتے پاکستان ترکی دے نال اپنڑے دفاع دے شعبے اچ مضبوط کرنڑ دا خواہش مند ہے ۔ایں موقع تے ترکش لینڈ فورس دے سربراہ جنرل صالح ذکی چولاک آکھیا جو پاکستان تے ترکی دے برادرانہ تعلقات دیاں پاڑاں تاریخ نال جڑیاں ہویاں ہن ۔جنرل صالح ذکی صدر مملکت تے پاکستان دی حکومت دا شکریہ ادا کریندے ہوئیں آکھیا جو انہاں سانگے اے وڈے اعزاز دی گالھ ہے جو انہاں کوں نشان امتیاز ملٹری نال نوازیا گیا ہے ۔انہاں ایں امید دا اظہار کیتا جو مستقبل اچ ڈوہیں ملکاں وچال مزید نویں رستے کھل ویسن اتے ڈوہیں ملک رل تے دہشت گردی ،مہاجراں تے سرحدی سلامتی جیہوجے مسلیں تے قابو پا گھنسن۔