اسلام آباد ۔ 19 ستمبر (اے پی پی) صدر مملکت ممنون حسین آکھیا جو بھارت مقبوضہ کشمیر ا چ ظلم دا بازار گرم کر رکھیے جئیں دے نتیجے اچ گزریل کجھ مہینیاں اچ سو توں ودھ بندے شہید کر ڈتے گئن اتے لا تعداد تریمتیں دی بے حرمتی کیتی گئی اے پَر ہنڑ ویلھا آگئے جو عالمی برادری بھارت دے انہاں مظالم دا نوٹس گھن کراہیں مظلوم کشمیری عوام دے حق خودارادیت سانگے آواز چاوے جڈانجو اٹلی دی وزیر دفاع سین روبرٹا پینوتی مقبوضہ کشمیر اچ انسانی حقوق دی خلاف ورزی اتے ممنوعہ ہتھیاراں دے استعمال دی مذمت کریندیں ہوئیں آکھیا جو اٹلی دی حکومت ایں مسئلہ کوں عالمی برادری دے سامنڑے بھرپور طریقے نال چیسی۔صدر مملکت اٹلی دی وزیر دفاع سین روبرٹا پینوتی دی سربراہی اچ وفد نال ایوان صدر اچ سوموار کوں ملاقات اچ گالھ مہاڑ کریندیں ہوئیں آکھیا جو عالمی برادری بھارت تے زور ڈیوے جو او بے گناہ کشمیریاں تے تشدد دی کاروائیاں فوراً بند کرے اتے خطہ اچ دیر پا امن سانگے کشمیریاں دے مسئلہ کوں اقوام متحدہ دی قرارداداں دے مطابق حل کیتا ونجے۔صدر مملکت آپنڑے تحفظات دا اظہا ر کریندیں ہوئیں آکھیا جو مقبوضہ کشمیر اچ بھارتی فوج انسانی حقوق دی کھلم کھلا خلاف ورزی اتے بے گناہ کشمیریاں تے ظلم کریندی پئی اے۔بھارت کشمیریاں دے حق خود ارادیت کوں دباونڑ دی کوشش کریندا پئے جیڑھا جو انسانی حقوق دی خلاف ورزی اے۔
