اسلامی ملکاں وچال تجارت اچ ودھارا بہوں ضروری ہے ،او آئی سی دے رکن ملک اپنڑیاں ضرورتاں اسلامی ملکاں دی مصنوعات نال پوریاں کرن ،پاکستان تے مراکش وچال سانجھی تجارت ودھاونڑ دی ضرورت ہے
اسلام آباد ۔ 23 ستمبر (اے پی پی) صدر مملکت ممنون حسین آکھیا ہے جو اسلامی ملکاں وچال تجارت اچ ودھارا بہوں ضروری ہے ،او آئی سی دے رکن ملک اپنڑیاں ضرورتاں اسلامی ملکاں دی مصنوعات نال پوریاں کرن ،پاکستان تے مراکش وچال سانجھی تجارت ودھاونڑ دی ضرورت ہے ،انہاں اے گالھ جمعے کوں مراکش دے سبکدوش تھیونڑ آلے سفیر مصطفی صلاح الدین نال ایوان صدر اچ ملاقات دے دوران آکھی ۔صدر مملکت آکھیا جو تجارت اچ ودھارے سانگے پاکستان تے مراکش وچال غیر ضروری ٹیکس دا خاتمہ تھیونڑاں چاہیدا ہے تاں جو تجارتی سرگرمیاں اگی تے ودھ سگن ،صدر مملکت آکھیا جو پاکستان اچ سرمایہ کاری سانگے ماحول سازگار ہے جیں دا فائدہ مراکش دے سرمایہ کاراں کوں وی چاونڑاں چاہیدا ہے ۔انہاں مراکش دے وزیراعظم عبد اللہ بین کیرین دی قیادت اچ مراکش دی ترقی تے خوشحالی دے پاسے سفر دی تعریف کیتی ۔ایں موقع تے سبکدوش تھیونڑ آلے مراکش دے سفیر پاکستانی حکومت دا علاقائی اتے عالمی معاملات اچ مراکش دی حمایت دا شکریہ ادا کیتا ۔
