واشنگٹن۔ 22 ستمبر (اے پی پی) وزیراعظم محمد نواز شریف اقوام متحدہ دی جنرل اسمبلی نال خطاب دے دوران مسئلہ کشمیر کوں چنگے انداز وچ پیش کیتاہے جیندے وچ انہاں عالمی برادری تے زور ڈتا جوا وہ لمبے عرصے توں جاری ایں تنازعے کوں مکاونڑ سانگے اپنڑاں کردار ادا کرین، جیندے دوران ہزاراں بے گناہ معصوم کشمیریاںکو ںشہید کیتا گئے۔امریکا وچ رہونڑآلے دنیا دے مختلف ملکاں دے باشنداں اتے پاکستانی برادری وزیراعظم دے جنرل اسمبلی نال خطاب دے بعد اے پی پی نال گالھ مہاڑ کریندے ہوئیںآکھیا جو پاکستان دی سیاسی جماعتاں کوں اپنڑے اختلافات بھلا تے مسئلہ کشمیر دے حوالے نال حکومت دیاں کوششاں وچ تعاون کرنڑ چاہیدے تاں جو مقبوضہ کشمیر وچ جاری بھارتی ظلماں تے عالمی توجہ مبذول کرائی ونج جاسگے۔انہاں آکھیا جو وزیراعظم خطاب دے دوران اقوام عالم توں مطالبہ کیتا جو ا وہ بھارتی مقبوضہ کشمیر وچ کشمیریاں دے قتل عام دیاں تحقیقات کروانڑ اتے ایں حوالے نال اقوام متحدہ دا فیکٹ فائنڈنگ مشن مقبوضہ کشمیر بھیجیا ونجے۔انہاں آکھیا جو عالمی رہنماواں کوں وزیراعظم محمد نوازشریف دیاں قیام امن دیاں کوششاں دا ساتھ ڈیونڑ چاہیدے اتے اگر مسئلہ کشمیر کوں پرامن طریقے نال حل نہ کیتاگیا تاں ایندے نال دنیا دے امن وامان کوں خطرہ تھی سگدے کیونجو پاکستان اتے بھارت ڈوہائیں ایٹمی طاقتاں ہن ۔ پاکستان لنک انٹرنیشنل دے صدر حمید ملک آکھیا جو پوری پاکستانی امریکی برادری نوازشریف دی حکومت دے پچھوں کھڑی ہے اتے انہاں دیاں پالیسیاں دی بھرپور حمایت کریندی ہے ، انہاں آکھیا جو پہلی واری کہیں پاکستانی رہنما نہ صرف مسئلہ کشمیر کو ںاقوام متحدہ وچ وڈے واضح اتے چنگے انداز وچ پیش کیتا ہے بلکہ انہاں بھارتی ظلماں دے خلاف ثبوت وی اقوام متحدہ کوں پیش کیتے ہن اتے ڈسایا ہے جو مقبوضہ کشمیر وچ جولائی توں جاری حالیہ پرتشدد واقعات وچ بھارتی مقبوضہ فوجیاں 100 توں ودھ معصوم کشمیریاں کوں شہید کرڈتا ہے۔ معروف کشمیری رہنماء اتے امریکا وچ قائم ورلڈ کشمیر اویئرنس دے جنرل سیکرٹری ڈاکٹر غلام نبی فائی وزیراعظم دے خطاب دی تعریف کریندے ہوئیں حکومت پاکستان داشکریہ ادا کیتا ہے جونوازشریف اقوام متحدہ دی جنرل اسمبلی وچ بین الاقوامی لیڈراں کوں کشمیر دے مسئلے بارے آگاہ کیتا اتے کشمیریاں دی اخلاقی اتے سفارتی معاونت کیتی۔جارج میسن یونیورسٹی دے اینی کیمرون اتے امریکن مسلم الائنس دے نیشنل ڈائریکٹر سلیم اختر بین الاقوامی سطح تے مسئلہ کشمیر کو ںاجاگر کرنڑ دے سلسلے وچ وزیراعظم محمد نواشریف دیاں کوششاں دی تعریف کیتی ۔انہاں آکھیا جو پاکستانی امریکن برادری پاکستانی امریکی برادری معصوم کشمیریاں تے بھارت دی ریاستی دہشت گردی دی مذمت کریندی ہے۔
