نیویارک ۔ 19 ستمبر (اے پی پی) وزیراعظم محمد نواز شریف اقوام متحدہ دی جنرل اسمبلی دے 71 ویں اجلاس اچ شرکت سانگے بہوں اہم دورہ تے نیو یارک پج گے ہن۔وزیراعظم ہائوس توں جاری بیان دے مطابق تریجھی دفعہ وزیراعظم دا عہدہ سانبھنڑ دے بعد او جنرل اسمبلی توں اپنڑاں چوتھاخطاب کریسن ۔نیو یارک اچ اپنڑے قیام دے دوران وزیرا عظم 21ستمبر 2016کوں اقوام متحدہ دی جنرل اسمبلی توں خطاب اچ کئی اہم بین الاقوامی امور تے پاکستان دا موقف پیش کریسن ۔وزیراعظم گزریل سال وانگوں ایں دفعہ وی کشمیر دے مسلے تے خصوصی توجہ ڈویسن ۔او کشمیری رہنما برہان الدین وانی دے ماروائے عدالت قتل دے بعد مقبوضہ کشمیر اچ بنیادی انسانی حقوق دیاں خلاف ورزیاں تے عالمی رہنماواں دی توجہ ڈویسن ۔بیان دے مطابق وزیراعظم مقبوضہ کشمیر دے پرانڑے مسئلے دے وختی حل دی ضرورت تے زور ڈیسن ۔وزیراعظم بین الاقوامی برادری تے اقوام متحدہ توں مطالبہ کریسن جموں تے کشمیر دے عوام دے حق خود ارادیت سانگے کیتے گے وعدے دی پاسداری کیتی ونجے جیں دا وعدہ اقوام متحدہ دی سلامتی کونسل دیاں قرار داداں اچ کیتا گیا ہا ۔وزیراعظم اپنڑے خطاب اچ علاقائی تے بین الاقوامی امن تے استحکام سانگے پاکستانی کوششاں تے وی روشنی پیسن ۔دورہ نیو یار ک دے دوران وزیرا عظم نواز شریف بین الاقوامی رہنماواں کوں محفوظ ‘ مستحکم اتے معاشی طور تے ترقی کریندے ہوئے پاکستان دے حوالے نال وی ڈسیسن ۔ایندے نال نال وزیراعظم قومی ،علاقائی ،بین الاقوامی امن تے سلامتی ،انتہا پسندی اتے دہشت گردی دے خاتمے سانگے مسلح فوج ،قنون لاونڑ آلے اداریں ‘ پولیس اہلکاراں سمیت عوام دی لازوال قربانیاں تے وی روشنی پیسن ۔اقوام متحدہ دی جنرل اسمبلی اچ شرکت دے نال نال وزیراعظم اپنڑے برطانوی ہم منصب ‘ ترکی دے صدر ‘ ایرانی صدر’ جاپان دے وزیراعظم ‘ نیوزی لینڈ دے وزیراعظم اتے اقوام متحدہ دے سیکرٹری جنرل بان کی مون اتے امریکی وزیرخارجہ جان کیری نال وی ملاقاتاں کریسن ۔ایں موقع تے وزیراعظم سعودی عرب دے ولی عہد نائب وزیراعظم ‘ نیپال اتے رومانیہ دے وزرائے اعظم سمیت کئی عالمی راہنماواں نال وی ملاقاتاں کریسن۔وزیراعظم چین پاکستان اقتصادی راہداری منصوبے کو ںحقیقت دا روپ ڈیونڑ دے حوالے نال پاکستان تے چین دی سفارتی کاوشاں بارے عالمی رہنماواں کوں آگاہی ڈیسن ۔وزیراعظم محمد نوازشریف اپنڑے جنرل اسمبلی دے خطاب دے دوران پناہ گزیناں دے عالمی مسئلے تے پاکستانی موقف دی وضاحت وی کریسن ایندے علاوہ وزیراعظم یو ایس پاکستان بزنس کونسل دے اہتمام نال تقریب توں وی خطاب کریسن۔
