سبی ۔یکم ستمبر (اے پی پی) وزیراعظم محمد نواز شریف آکھیا جو سڑکاں دی تعمیر نال ترقی،امن اتے خوشحالی دا نواں دور شروع تھیسی،پسماندہ علاقیاں اچ سڑکاں دی تعمیر حکومت دی پہلی ترجیح اے،سی پیک دا منصوبہ دشمناں کوں ہضم نی تھیندا پئیا،اندرلی اتے باہرلی طاقتاں بے نقاب تھی چکین جنہاں بلوچستان دی عوام کوں محروم کیتا،اللہ دے فضل تے کرم نال دہشت گرداں دی چیل بھن ڈتی اے،آپنڑی منزل تے پج کراہیں ساہ گھنسوں،بلوچستان دی عوام دے خواب پورے تھیونڑ دا ویلھا آگئے ،ترقی برائے قومی وحدت دے تصور کوں اگوں ودھیندے پئیوں،پہلے کوہلو سبی وچال 600کلومیٹر دا سطے طے کرنڑاں پمدا ہئی ہنڑ عوام کوں صرف 174کلومیٹر دا سفر کرنڑاں پمسی۔اے گالھیں انہاں خمیس کوں اتھاں سبی،ہلو شاہراہ دے افتتاح دے موقع تے خطاب کریندیں ہوئیں آکھی۔ایں موقع تے گورنر بلوچستان محمد خان اچکزئی، وزیراعلیٰ بلوچستان سردار ثناء اﷲ زہری، وفاقی وزیر ترقی تے منصوبہ بندی احسن اقبال، وفاقی وزیر پورٹس اینڈ شپنگ حاصل بزنجو، وفاقی وزیر سیفران لیفٹیننٹ جنرل (ر) عبدالقادر بلوچ، مشیر برائے قومی سلامتی ناصر خان جنجوعہ، کمانڈر سدرن کمانڈ لیفٹیننٹ جنرل عامر ریاض اتے این ایل سی دے سربراہ میجر جنرل مشتاق وی موجودہن۔وزیر اعظم آکھیا جو ہر نواں رستہ ہک نویں امکان دا رستہ کھولیندے،اج جو ہک سڑک دا افتتاح تھیندا پئے تاں اے صرف رستہ دا ای افتتاح نی جڈانجو خوشحالی اتے امن تے ترقی دے امکانات دا دروازہ کھولیندا پئے ،بلوچستان دی خوشحالی اساڈی منزل اے،ایں تئیں پجنڑ سانگے رستیاں دی تعمیر ضروری اے۔انہاں آکھیا جو بلوچستان دی ترقی سانگے دعوے وی کیتے گئے اتے صوبہ دی ترقی کوں آپنڑی منزل قرار ڈتا گئے جڈانجو ایں منزل تئیں پجنڑ سانگے رستے وی ضروری ہن ۔انہاں آکھیا جو اج جیڑھی سڑکاں بنڑیاں پئن اے ترقی دا رستی اے،بہترین انفراسٹرکچر دے بغیر ترقی دا خواب ادھورا رہندے ،اج توں پہلے کہیں ایجھے علاقیاں اچ سڑکاں بنڑاونڑ دا سوچا ای کائنا ہئی اتے اگر سوچا وی تاں کیتا کجھ کائنی ۔انہاں آکھیا ج وترقی سانگے ڈو گالھیں ضروری ہن،ساریاں توں وڈی چیز جدید انفراسٹرکچر اے،سرمایہ کار کوں مواصلات دے قابل بھروسہ نظام دے بغیر اعتماد نی ڈتا ونج سگدا۔سرمایہ کار بین الاقوامی منڈی تئیں رسائی چاہندے،ساکوں انفراسٹرکچر کوں پورے ملک اچ پھیلاونڑاں اے خصوصی بور ایجھے علاقیاں اچ جتھاں سڑک موجود کائنی اتے عوام ڈوجھے علاقیاں توں کٹیے ہوئین ۔وزیرا عظم آکھیا جو اساں اقتدار سنبھالیا تاں بلوچستان دی عوام کوں مسئلے توں ڈو چار ہن ،انہاں دہشت گردی اتے غربت تے افلاس دا سامنڑاں ہئی ،بلوچستان دی عوام کوں ماضی اچ محرورم رکھیا گئیا،اللہ دے فضل و کرم نال دہشت گرداں دی چیل بھن ڈتی اے اتے اندرلی اتے باہرلی طاقتاں بے نقاب تھی گئن جنہاں بلوچستان کوں عوام محروم کیتے ۔وزیر اعظم پاک فوج اتے سکیورٹی اداریاں کوں قربانیاں کوں خراج تحسین پیش کیتا جئیں دی بدولت دہشت گرداں کوں منہ دی کھاونڑی پئی اے۔انہاں آکھیا جو میں وزیر اعلیٰ بلوچستان کوں آکھیے جو ایں علاقے اچ سکول بنڑاون اتے ڈسپنسریاں اتے چھوٹے ہسپتال بنڑاون تانجو اتھاں دی عوام کوں تعلیم اتے صحت دی سہولتاں ہوون۔
