اسلام آباد ۔ 21 ستمبر (اے پی پی) وزارت خارجہ دے ترجمان محمد نفیس زکریا آکھیا جو پاکستان مسلم لیگ(ن) دی حکومت یکا کشمیریاں دے حق خود ارادیت دی وڈی حمایت کیتی اے،وزیر اعظم محمد نواز شریف ہر اہم عالمی فورم تے مسئلہ کشمیر کوں کھل کراہیں نشابر کیتے،پاکستان دے مسئلہ کوں کشمیر دے موثر انداز اچ پیش کرنڑ پاروں ساری دنیا دی نظراں ایں ویلھے مقبوضہ کشمیر دی صورت حال تے لگی ہوئی ہن ۔اے گالھیں انہاں بدھ کوں پی ٹی وی دے ہک پروگرام چوتھا ستون اچ گالھ مہاڑ کریندیں ہوئیں آکھی۔انہاں آکھیا جو کشمیریاں آپنڑی آزادی اتے حق خودارادیت سانگے جیڑھی قربانیاں ڈتین او کڈاہیں رائیگاں کائنا ویسن۔وزیر اعظم محمد نواز شریف پہلے وی کشمیر دے مسئلہ کوں عالمی سطح تے موثر انداز اچ پیش کریندے آئے ہن اتے ہنڑ وی جنرل اسمبلی دے اجلاس اچ انہاں دی تقریر دا مطمع نظر وی مسئلہ کشمیر ہوسی جڈانجو بھارت دی ریاستی دہشت گردی اتے پاکستان اچ مداخلت کوں وی اجاگر کیتا ویسی تانجو دنیا کوں بھارت دا اصلی چہرہ ڈکھایا ونج سگے۔وزارت خارجہ دے ترجمان آکھیا جو بھارتی وزیر اعظم نریندر مودی دا بنگلہ دیش اچ ونج کراہیں اے گالھ منڑ جو مشرقی پاکستان کوں تروڑنڑ اچ بھارت دا ہتھ ہئی ،بھارتی خفیہ ایجنسی را دے ایجنٹ کلبھوشن یادیو داپاکستان توں پکڑیا ونجنڑ اتے ایں گالھ دا اعتراف وی کرنڑ جو بھارت پاکستان ا چ دہشت گردی اتے انتہا پسندی اچ ملوث اے اتے مقبوضہ کشمیر اچ نہتے اتے بے گناہ کشمیریاں کوں شہید کرنڑ نال بھارت دا حقیقی چہرہ دنیا کوں نظر آونڑ شروع تھی گئے اتے ایہو وجہ اے جو مقبوضہ کشمیر اچ بھارتی مظالم دی شدید مذمت کیتی اے جڈانجو اٹلی،نیوزی لینڈ،ترکی ،چین اتے امریکا سمیت بئے اہم ملک وی مقبوضہ کشمیر وادی اچ کشمیریاں تے کیتے ونجنڑ آلے بھارتی مظالم دی مذمت کر چکین ۔
