اسلام آباد ۔ 26 ستمبر (اے پی پی) وفاقی وزیر منصوبہ بندی تے ترقی احسن اقبال آکھے جو سی پیک نال خطے اچ ترقی دیاں نویاں راہواں کھلسن، اتے ہمسایہ ملکاں کوں چین نال سستے نرخاں اُتے تجارت کرنڑ اچ مدد ملسی ، پاکستان دی ودھدی ہوئی شہری آبادی دے چیلنجز نال نبڑنڑ کیتے پاکستان کوں چین دے تجربے توں فیدہ چاونڑ دی لوڑ ہے ۔ اے گالہیں انہاں سنوار کوں بیجنگ اچ سینٹر فار انٹرنیشنل اکنامک ایکسچینجز دے ایگزیکٹو وائس چیئرمین اتے سابق وائس چیئرمین نیشنل ڈویلپمنٹ اینڈ ریفارم کمیشن چین شانگ نال گالھ مہاڑ اچ آکھیاں۔ ایں موقعے تے وفاقی وزیر احسن اقبال آکھیا جو سی پیک نال خطے اچ ترقی دیاں نویاں راہواں کھلسن اتے ہمسایہ ملکاں کون چین نال سستے نرخاں اُتے تجارت کرنڑ اچ مدد ملسی ۔ انہاں آکھیا جو سی پیک دے تحت پاکستان اتے چین وچال توانائی اتے ڈھانچے دے بہوں سارے منصوبیاں اُتے کم تھیندا پئے ، جڈانجو ہنڑ اساکوں علم دی سانجھے داری تے وی کم کرنڑاں ہوسی ۔ احسن اقبال آکھیا جو پانڑیں دے ذخیریاں اتے سمال اینڈ میڈیم انٹرپرائزر شعبے اچ بہتری کیتے وی چین نال رل تے کم کرنڑ دی لوڑ ہے ۔ وفاقی وزیر سی سی آئی ای ای دے سی ای او کوں دسمبر اچ تھیونڑآلی سالانہ کانفرنس اچ شرکت دی دعوت ڈیندے ہوئیں آکھے جو پائیڈ اتے سی سی آئی ای ای وچال مضبوط تعلقات قائم کیتے ونج سگدے ہن ۔ سی سی آئی ای ای دے چیف ایگزیکٹو سی پیک تے کم دی رفتار دی تعریف کریندے ہوئیں آکھیا جو ایندے اُتے کم کہیں وی بئی راہداری توں ودھ تیز تھیندا پئے ۔ انہاں دا آکھنڑ ہئی جو سی پیک پاکستان اتے چین دی دوستی دی بہترین مثال ہے جیندے نال خطے دے لوکیں کوں بہوں وڈا فیدہ تھیسی۔
