پاکستان اتے ویسٹ انڈیز دیاں ٹیماں وچال پہلا ون ڈے اج تھیسی

شارجہ۔ 29 ستمبر(اے پی پی) پاکستان اتے ویسٹ انڈیز دیاں کرکٹ ٹیماں وچال ترائے ہک ڈے میچاں دی سیریز دا پہلا میچ اج جمعے کوں شارجہ سٹیڈیم اچ کھیڈیا ویسی ،ترائے میچ ڈے اینڈ نائٹ ہوسن اتے میچ پاکستان وقت دے مطابق تریجھے پہر 4وجے شروع تھیسی ۔ڈوہیں ٹیماں وچال سیریز دا ڈوجھا ون ڈے میچ 2اکتوبر کوں شارجہ جڈاں جو تریجھا تے چھیکری میچ 5اکتوبر کوں ابو ظہبی سٹیڈیم اچ کھیڈیا ویسی ۔ایندے توں پہلے کھیڈی گی ٹی ٹونٹی سیریز اچ پاکستانی ٹیم ویسٹ انڈیز کوں 3-0توں ہرا ڈتا ہئی ۔سرفراز احمد دی کامیاب کپتانی دے بعد ہنڑ ویسٹ انڈیز دے خلاف ون ڈے سیریز اچ اظہر علی دی کپتانی کا کڑا امتحان تھیسی ۔