شکاگو ۔ 26 ستمبر (اے پی پی) پاکستان اپنڑے پڑوس اچ امن تے استحکام چاہندے لیکن اگر کہیں وی سرحد پار توں مہم جوئی کیتی تاںایکوںمنہ تروڑ جواب ڈتا ویسی۔ ایہ گالھ امریکا وچ پاکستان دے سفیر جلیل عباس جیلانی شکاگو دی ایسٹ ویسٹ یونیورسٹی وچ ہک تقریب دے نال خطاب وچ آکھی۔ انہاں آکھیا جو پاکستان دا دفاع ناقابل تسخیر بنڑاڈتا گیا ہے۔ انہاں شرکاءکوں وزیر اعظم نواز شریف دے کامیاب دورہ اقوام متحدہ بارے ڈسیندے ہوئیں آکھیا جووزیر اعظم ایں دورے وچ کشمیریاں دی حق خودارادیت سانگے تریخی جدوجہد اتے مقبوضہ کشمیر وچ انسانی حقوق دیاں خلاف ورزیاں کوں اجاگر کیتا۔ انہاں شرکاءکوں پاک امریکا تعلقات دے حوالے نال تازہ ترین صورتحال بارے وی ڈسایا اتے آکھیا جو انہاں تعلقات کوں پکا کرنڑ سانگے امریکا وچ رہنڑ آلے پاکستانی اپنڑے بالاں کوں سماجی تے سیاسی سرگرمیاں وچ ودھ چڑھ تے حصہ گھننڑ ڈیون ۔ جنوبی ایشیائی صورتحال تے گالھ مہاڑ کریندے ہوئیں انہاں آکھیا جو 2001ءاتے 2003ءوچ وی پاکستان اتے بھارت وچال کشیدگی پیدا تھئی ایندے بعد پاکستان اپنڑاں دفاع ناقابل تسخیر بنڑایاہے ۔ انہاں ڈسایا جو پاکستان کامیاب کارروائیاں نال دہشتگردی دی لہر دا زور تروڑ ڈتا ہے ۔ انہاں ایں تاثر کوں مسترد کر ڈتا جو پاکستان عالمی برادری وچ کلھا ہے انہاںآکھیا جو اقوام متحدہ دی جنرل اسمبلی دے حالیہ سالانہ اجلاس دے موقع تے وزیر اعظم محمد نواز شریف دی امریکا، برطانیہ ، چین ، نیوزی لینڈ اتے ایران دے رہنماواں نال ملاقاتاں ایں تاثر دے غلط ہونڑ دا ثبوت ہن۔ پاکستانی سفیر شرکاءکوں پاکستان دی اقتصادی ، سماجی اتے سیاسی صورتحال بارے ڈسایا اتے ملک کوں درپیش چیلنج بارے وی ڈسایا ، انہاں ڈسایا جو پاکستانی معیشت دے اشاریے مثبت ہن اتے باہرلے ملک رہونڑ آلے پاکستانی اپنڑے ملک وچ ودھ توںودھ سرمایہ کاری کر تے ملکی معیشت دی ترقی وچ اپنڑاں کردار ادا کر سگدے ہن۔ ایں موقع تے قونصل جنرل فیصل نیاز ترمذی وی خطاب کیتا، واشنگٹن وچ ڈیفنس اتاشی بریگیڈیئر سرفراز علی اتے شکاگو وچ کمرشل قونصلر عامر ترین پاکستان وچ سیاست دے حوالے نال صورتحال اتے سرمایہ کاری دے موقعاں بارے بارے پریذنیٹیشن وی ڈتی ۔
