پرانڑے جھیڑیں دا حل ،غیر ملکی قبضہ تے حق خود ارادیت توں انکا ر جیہوجے امور کوں اقوام متحدہ دی دہشت گردی دے خاتمے دی حکمت عملی اچ شامل کرنڑاں چاہیدا ہے ،پورے اہداف حاصل تھیونڑ تئیں اپریشن ضرب عضب جاری رہسی
اقوام متحدہ ۔ 10 اکتوبر (اے پی پی) اقوام متحدہ اچ پاکستان دی مستقل مندوب ڈاکٹر ملیحہ لودھی آکھیا ہے جو پرانڑے جھیڑیں دا حل ،غیر ملکی قبضہ تے حق خود ارادیت توں انکا ر جیہوجے امور کوں اقوام متحدہ دی دہشت گردی دے خاتمے دی حکمت عملی اچ شامل کرنڑاں چاہیدا ہے۔اے گالھ انہاں جنرل اسمبلی دی چھیویں کمیٹی توں خطاب کریندے ہوئیںکیتا ۔اے کمیٹی دہشت گردی دے خلاف کنونشن تے کم کریندی پئی ہے ۔ڈاکٹر ملیحہ لودھی آکھیا جو مجوزہ مسودہ اچ دہشت گردی تے لوکاں دے حق خود ارادیت اتے باہرلے قبضے دے خلاف جدوجہد اچ واضح فرق رکھنڑاں چاہیدا ہے ۔انہاںآکھیا جو کشمیر تے فلسطین اچ نہتے کشمیریاں دا قتل عام جاری ہے ،بین الاقوامی برادری دا ایں گالھ تے اتفاق ہے جو انسانی حقوق دیاں پامالیاں دی وجہ توں انتہا پسندی اچ ودھارا تھیندا پیا ہے ،اپنڑے حق خود ارادیت اتے باہرلے قبضے دے خلاف جدو جہد کرنڑ آلیں دے خلاف ریاستی طاقت دا استعمال دہشت گردی ہے ،دہشت گردی دے خلاف پاکستانی عزم دا اعادہ کریندے ہوئیں انہاں آکھیا جو پاکستان دہشت گردی دا شکار ہے اتے دہشت گردی دے خاتمے سانگے اپریشن ضرب عضب شروع کیتادہشت گردی دی وجہ توں 60ہزار توں ودھ سیکورٹی اہلکار تے پاکستانی شہری ہلاک تھی گے ہن ۔ڈو لکھ فوج دہشت گردی دے خلاف اپریشن اچ چنگیاں کامیابیاں حاصل کیتیاں ہن ،اہداف دے حصول تئیں اے اپریشن جاری رہسی ،ایندے علاوہ دہشت گردی دے خاتمے سانگے لمبی مدت بنیاداں تے اقدامات دے ضمن اچ نیشنل ایکشن پلان تے وی عمل در آمد جاری ہے ۔انہاں آکھیا جو ایں گالھ تے اتفاق پاتا ویندا پئے جو دہشت گردی کوں کہیں مذہب نال رلایا نی ونج سگدا تاں جو ایندے با وجود مغربی ملکاں اچ سجی بانہہ دیاں کجھ سیاسی جماعتاں ولوں اسلام فوبیا کوں ودھارا ڈتا ویندا پئے ،نفرت کھنڈاونڑ آلے ایجھے عناصر دے خلاف ہنڑ تئیں کوئی کاروائی کیوں نی تھی سگی ۔
