ایم ڈی آئی ایم ایف دی وفاقی وزیر خزانہ سینیٹر اسحاق ڈاردے نال پریس کانفرنس

اسلام آباد ۔ 25 اکتوبر (اے پی پی) وفاقی وزیر خزانہ سینیٹر اسحاق ڈار آکھے جو حکومت گزریل ترائے سالیں اچ حاصل کیتیاں گیاں کامیابیاں کوں پائیدار بنڑاونڑ دے نال نال آندے ڈو سالیں اچ غربت کوں مکاونڑ ، مجموعی ترقی، روزگار اتے سماجی شعبے کیتے موقعے پیدا کرنڑ اُتے توجہ جاری رکھیسی۔ منگل کوں اتھاں انٹرنیشنل مانیٹری فنڈ (آئی ایم ایف) دی مینجنگ ڈائریکٹر کرسٹین لاگارڈ دے انل پریس کانفرنس نال خطاب کریندے ہوئیں انہاں ایںگالھ تے خوشی دا اظہار کیتا جو پاکستان تریخ اچ پہلی واری آئی ایم ایف دا پروگرام کامیابی نال پورا کیتے ، اے پروگرام اساڈے ڈتے گئے اصلاحاتی ایجنڈے نال جڑیا ہویاہے ۔ انہاں آکھیا جو پاکستان دی معیشت مستحکم ہے اتے ہنڑ ایں کوں نویں پروگرام دی لوڑکائنی ، جڈانجو پاکستان اتے آئی ایم ایف وچال مختلف شعبیاں اچ صلاح مشورہ جاری ہے ۔ انہاں آکھیا جو اساں جامع اقتصادی اتے مالیاتی اصلاحات نافذ کیتیاں ہن ،جنہاں دے نتیجے اچ ملکی معیشت مستحکم تھئی ہے ، بجٹ خسارے اچ واضح گھٹکی تھئی ہے ، جڈانجو ایندے اچ بئی گھٹکی تھیونڑ دی توقع ہے ۔ اسحاق ڈار آکھیا جو ایں سال ترقیاتی اخراجات ودھ تے اٹھ سو ارب روپے کیتے گئے ہن جیہڑے جو ترائے سال پہلے ترائے سوارب ہن، حکومت سماجی تحفظ دے پروگراماں کیتے فنڈز ا چ وی کئی گنا ودھارا کیتے ۔ پاکستان تحریک انصاف دے احتجاج بارے ہک سوال دے جواب اچ وفاقی وزیر آکھیا جو قنون آپنڑاں رستہ آپ بنڑا گھنسی ، کئی وی آئین اتے قنون توں ودھ تے کائنی ۔