اسلام آباد ۔ 26 اکتوبر (اے پی پی) وفاقی وزیر دفاعی پیداوار رانا تنویر حسین آکھیا ہے جو پاکستان مسلم لیگ (ن)دی موجودہ حکومت دہشتگردی کوں مکاونڑ سانگے چنگے اقدامات کیتے ہن اتے سکیورٹی فورسز وی ایندے خلاف بر سرپیکار ہن۔ذرائع ابلاغ نال گالھ مہاڑ وچ سانحہ کوئٹہ دی شدید مذمت کریندے ہوئیں انہاں آکھیا جو بلوچستان وچ اساڈا دشمن سرگرم ہے ۔ بلوچستان دے حوالے نال بھارتی وزیر اعظم مودی دے بیان دے بعد را دے ملوث ہوونڑ وچ کوئی شک باقی نی راہندا ۔ انھاں آکھیا جو بھارت کوں پاک چین اقتصادی راہداری ہضم نی تھیندی پئی اتے او ایندے اچ لت اڑاونڑ تے پاکستان کوں غیر مستحکم کرنڑ دیاں کوششاں کر یندا پئے جیندے وچ اینکوں کڈاہیں کامیابی نہ تھیسی۔رانا تنویر آکھیا جو اساکوںملک دے باہروں اتے اندر دے معاملیاں تے نظر رکھنڑدی ضرورت ہے۔ انھاں آکھیا جو دشمن ملک وچ انتشار کھنڈاونڑ دیاں کوششاں کر یندا ہے اتے کجھ سیاسی عناصر وی ایندے آلہ کار بنڑے ہوئے ہن۔ انھاں آکھیا جو پاکستان نازک دور توں گزر دا پئے اتے موجودہ حکومت اندردے اتے باہردے خطریںنال نبڑن سانگے چنگے اقدامات کریندی پئی ہے۔ ایں موقع تے رکن قومی اسمبلی اسفن یار بھنڈارآکھیا جو سانحہ کوئٹہ تے ساریاں سیاسی جماعتاں اتے قوم افسردہ ہے۔ انھاں آکھیا جو کوئٹہ وچ وکیلاں تے حملے دے بعد پولیس سنٹر تے ڈوجھا وڈا حملہ ہے اساکوں قومی یکجہتی اتے سکیورٹی اقدامات کوںودھ چنگا ںبناونڑ دی ضرورت ہے۔
