لاہور۔11 اکتوبر(اے پی پی )صو بائی وزیر امداد باہمی ملک محمد اقبال چنڑ آکھے جو محرم الحرام اچ پائیدار امن وامان اتے مذہبی ہم آہنگی کوں برقرار رکھنڑ کیتے ذرائع ابلاغ دا کردار کلیدی اہمیت رکھیندے اتے میڈیا دا فرض ہے جو او انہاں مقدس ڈینہاں دی کوریج کیتے بہوں ذمہ دارانہ’ تعمیری تے مثبت کردار ادا کرے ،حکومت امن و امان دی صورت حال کوں برقرار رکھنڑ کیتے ودھ سارے اقدامات کیتے ہن ۔ اے گالہیں انہاں محرم الحرام دے سلسلے اچ انتظامات بارے تھیونڑآلے اجلاس نال الیندے ہوئیں آکھیاں۔ انہاں آکھیا جو محرم الحرام دے مرکزی جلوس دی نگرانی اچ او آپ شامل ہوسن اتے یونین کونسلاں دے چیئرمین آپنڑیں متعلقہ علاقیاں دے عاشورہ د ے جلوساں اچ انتظامیہ دے نال شریک تھیون۔ بہاولپور ڈویژن دے 516 عاشورہ دے مختلف جلوساں اتے 1400مجلساں کیتے سکیورٹی تے بئے انتظامات کوں متعلقہ محکمیاں اخیری شکل ڈے ڈتی ہے ۔ انہاں آکھیا جو محرم الحرام دے دوران ڈویژنل اتے ڈسٹرکٹ سطح تے کنٹرول روم بنڑا ڈتے گئے ہن جتھاں میڈیا دے فوکل پرسن کوں24گھنٹے مکمل رسائی تے رہنمائی ڈتی ویسی ۔ پنجاب ایمرجنسی سروس ریسکیو1122 وی بہاولپور ڈویژن اچ ہر طرح دے انتظامات کوں اخیری شکل ڈے ڈتی ہے ۔ انہاں آکھیا جو ریسکیو 1122 بہاول پورڈویژن محرم الحرام کیتے ہک جامع ایمرجنسی پلان ترتیب ڈتے جیندے اچ 4 خصوصی ریسکیو پوسٹاں بمقام چاہ فتح خاں شیعہ مسجد ،چوک بازار ،حسینی چوک اتے کربلاماڈل ٹائون بی اچ بنڑائی گئی ہن ۔ ایں توں علاوہ 6 ایمرجنسی پوائنٹس بمقام حسینی چوک’چاہ فتح خاںبازار’چوک بازار’ امام بارگاہ روشن علی’ شاہدرہ ، لاری اڈا اتے فوارہ چوک اُتے بنڑا ئے گئے ہن ۔ انہاں آکھیا جو بہاولپور دیاں ساریاں اہم مجلساں اتے ماتمی جلوساں کیتے ریسکیورز سمیت ایمبولینسز، فائر وہیکلز، ریسکیو وہیکلزاتے ریکوری وہیکلز تعینات کیتیاں گیاں ہن ۔ انہاں آکھیا جو موبائل فون دی سہولت معطل ہونڑ دی صور ت اچ ریسکیو کنڑول روم 062-9250500 متبادل فون نمبر دی صورت اچ استعمال کیتا ونج سگسی ۔
