اسلام آباد۔31 اکتوبر (اے پی پی) وزیراعظم دے ترجمان ڈاکٹر مصدق ملک آکھیا ہے جو پاکستان تحریک انصاف سمیت کہیں وی جماعت کوں آئین تے قنون دے دائرے وچ راہندے ہوئیں پرامن احتجاج داحق حاصل ہے پر احتجاج دی آڑ وچ انتشار کھنڈاونڑ دی اجازت نی ڈتی ونج سگدی کیونجو کوئی وی قنون توں ماورا کائنی، پی ٹی آئی کوں چاہیدے جو ا وہ اپنڑے 02 نومبر دے احتجاج سانگے حکومت توں باقاعدہ تحریری درخواست کر تے اجازت گھنے اتے ایہ یقین وی ڈیواوے جو لاک ڈاﺅن نی بلکہ پرامن اتے مخصوص جاہ تے احتجاج کریسی۔ انہاں خیالیں دا اظہار انہاں اتوار دی شام ہک نجی ٹی وی چینل دے پروگرام وچ گالھ مہاڑ کریندے ہوئیں کیتا، انہاں آکھیا جو ملک وچ جمہوریت ہے اتے جمہوری نظام وچ پرامن احتجاج ہر شہری اتے ہر سیاسی جماعت دا حق ہے جیں کوںکہیں صورت اچ کائناں روکیا ویسی لیکن احتجاج دی آڑ وچ فساد یا انتشار کھنڈاونڑ دی کائناں ڈتی ویسی۔ترجمان وزیراعظم دا آکھنڑ ہا جوپی ٹی آئی یا کوئی بئی سیاسی جماعت اگر حکومت توں باقاعدہ تحریری درخواست دے ذریعے احتجاج دی اجازت گھنے تاں حکومت اینکوں کائناں جلھیسی بلکہ اینکوں سیکیورٹی وی ڈتی ویسی لیکن جڈاں کوئی ا یہ آکھے جو میں تاں نکلساں کیونجو میں اعلان کر ڈتا ہے تاں ول غیر قنونی کم تے قنون حرکت وچ امسی۔ انہاں آکھیا جو اساں رکاوٹاںعوام دے جان و مال دے تحفظ کوں یقینی بناونڑ سانگے لاتیاں ہن اتے اگراساں ا یہ رکاوٹاں ہٹا گھنوں تاں ایہ لوگ پہلے آلی کارول حملہ آور تھی ویسن۔ ڈاکٹر مصدق ملک آکھیا جو احتجاج دے دوران عوام دے جان تے مال دے تحفظ کوں یقینی بناونڑ سانگے حکومت اپنڑے سارے وسائل استعمال کریسی اتے عام لوکاں دے تحفظ کوں یقینی بنڑایا ویسی۔
