جموں وکشمیر کیتے وزیراعظم دے خصوصی نمائندے سینیٹر مشاہد حسین سید دی واشنگٹن اچ اے پی پی نال خصوصی گالھ مہاڑ

واشنگٹن ۔ 8 اکتوبر (اے پی پی) جموں وکشمیر کیتے وزیراعظم دے خصوصی نمائندے سینیٹر مشاہد حسین سید آکھے جو پاکستان تے بھارت وچال کشیدگی پاروں دہشتگردی دے خلاف جاری جنگ تے اثرات تھی سگدے ہن ، امریکہ کشمیر دے پرانڑیں حل طلب مسئلے دے حل اچ آپنڑاں کردارادا کرے، مسئلہ کشمیر حل نہ ہونڑ پاروں دنیا دے امن کوں خطرات راہسن۔ اے گالھ انہاں گزریل ڈینھ اتھاں واشنگٹن اچ اے پی پی نال خصوصی گالھ مہاڑ کریندے ہوئیںآکھی ۔ مشاہد حسین سید آکھے جو جنوبی ایشیا دے خطے اچ امن مذاکرات جامع ہونڑاں چاہیدے ہن اتے ایندے اچ انہاں دے سارے پہلووا ں کوں سامنڑیں رکھنڑاں ہوسی ،جیندے پاروں ایں حساس خطے اچ عدم استحکام پیدا تھیندا پئے ۔ انہاں آکھیا جو مسئلہ کشمیر ڈوجوہری ریاستاں وچال کشیدگی دی بنیادی وجہ ہے۔ سینیٹر مشاہد حسین سید اتے رکن قومی اسمبلی ڈاکٹر شذرہ منصب وزیراعظم دے خصوصی ایلچیاں دی حیثیت نال مسئلہ کشمیر تے کشمیری عوام دیاں جدوجہدکوں اجاگر کرنڑ کیتے امریکہ دے دورے تے ہن ۔ مشاہد حسین سید خبردار کیتا جو بھارت اتے پاکستان وچال کشیدگی پاروں افغانستان اچ دہشتگردی دے خلاف جنگ تے منفی اثرات تھی سگدے ہن ۔ پاکستان دہشتگرداں دے خلاف کارروائیاں کیتے افغانستان نال آپنڑیں مغربی سرحد اُتے ڈو لکھ دے نیڑے فوجی تعینات کیتے ہن ۔ جیکر بھارت نال کشیدگی اچ ودھارا تھیا تاں ایں صورت اچ پاکستان انہاں فوجیاں کوں آپنڑیں مشرقی سرحداں تے منتقل کرنڑ اُتے مجبور تھی ویسی ۔ مشاہد حسین سید آکھیا جو دہشتگردی دے خلاف جنگ اچ پاکستان دے 60 ہزار شہری اتے سیکورٹی اہلکار آپنڑیاں جاناں دے نذرانے ڈے چکے ہن ۔ پاکستان کوں چنگی طرح معلوم ہے جو قربانیاں کیا ہوندیاں ہن ۔ انہاں آکھیا جو مسئلہ کشمیر دے حل کیتے امریکہ کوں آپنڑاں فعال اتے موثر کردارادا کرنڑاں ہوسی ۔ امریکہ کشمیر بارے اقوام متحدہ دیاں قرارداداں دا دستخط کنندہ ہے اتے مسئلہ کشمیر دے حل کیتے کردارادا کرنڑاں امریکہ دی اخلاقی ذمہ داری بنڑدی ہے ۔ انہاں آکھیا جو او وزیراعظم دے ایلچی دی حیثیت نا ل نہیں جڈانجو ساری قوم دے نمائندیاں دی حیثیت نال امریکہ دا دورہ کریندے پئے ہن ، ایں دورے دے دوراساں اہم امریکی حکام ، میڈیا اتے کلیدی تھنک ٹینک نال ملاقاتاں کیتیاں ہن ۔ مشاہد حسین سید آکھیا جو امریکی میڈیا پاکستان اچ سرجیکل سٹرائیک دے بھارتی دعویٰ دا پول کھول ڈتے ۔