اسلام آباد ۔ 20 اکتوبر (اے پی پی)پاکستان آکھیا جو بھارت ولوں سندھ طاس معاہدے دی کہیں صورت وی خلاف ورزی کوں قبول کائنا کیتا ویسی اتے خلاف ورزی دی صورت اچ پاکستان مناسب کاروائی کریسی،بھارت ولوں کنٹرول لائن دی خلاف ورزیاں قابل مذمت ہن ۔پاکستان کوں کلھا نی کیتا ونج سگدا،پاکستان کوں کلھا کرنڑ دی بھارتی کوششاں ناکام تھی گئن ،بھارت افغانستان دی سرزمین کوں پاکستان دے خلاف استعمال کریندا پئے ۔خمیس کوں دفتر خارجہ دے ترجمان محمد نفیس ذکریا ہفتہ وار پریس بریفنگ وچال صحافیاں دے سوالاں دے جواب اچ آکھیا جو پاکستان بھارت ولوں سندھ طاس معاہدے دی خلاف ورزی کوں تسلیم کائنا کریسی۔پاکستان ایں بارے پیشرفت دا قریبی جائزہ گھند اپئے ،اگر معاہدے دی خلاف ورزی کیتی گئی تاں پاکستان مناسب کاروائی کریسی،ایل او سی تے فائرنگ دے تبادلے بارے سوال تے ترجمان آکھیا جو ایں سال وچال بھارت لائن آف کنٹرول تے 90وار توں ودھ سیز فائر دی خلاف ورزی کیتی اے،گزریل ڈینھ کوئی رٹہ اچ ایل او سی تے بھارتی فورسز ولوں بلا اشتعال فائرنگ نال ہک نینگر شہید جڈانجو پنج زخمی تھیے۔ترجمان آکھیا جو مقبوضہ کشمیر اچ برہان وانی دی ماورائے عدالت قتل اتے کشمیری عوام تے بے پناہ ظلم پاروں بھارت تے عالمی دبائو اچ ودھارا تھیے،ایں تناظر اچ بھارت مقبوضہ کشمیر اچ انسانی حقوق دی خلاف ورزیاں اتے مظالم تو ں عالمی توجہ ہٹاونڑ دی ناکام کوشش کریندا پئے ،پاکستان بھارتی مظالم کوں عالمی سطح تے اجاگر کریندا پئے اتے اوندے چنگے نتیجے سامنڑے امسن۔
