سفارتکار نال بدسلوکی ویانا کنونشن اتے سفارتی آداب دی خلاف ورزی اے، ،ترجمان دفتر خارجہ

اسلام آباد ۔ 27 اکتوبر (اے پی پی) پاکستان نویں دہلی اچ لگیے پاکستانی سفارتکار کوں ناپسندیدہ شخصیت آکھنڑ اتے ملک بدری دی بھارتی کاروائی دی مذمت کریندیں ہوئیں بھارتی حکومت دے ایں فیصلے کوں منفی آکھیے۔دفتر خارجہ دے ترجمان دے مطابق بدھ کوں نویں دہلی اچ پاکستانی ہائی کمیشن دے سفارتکار کوں بھارتی حکام کوڑے اتے بے بنیاد الزامات دے تحت حراست اچ گھدے۔جڈانجو پاکستانی ہائی کمیشن دی مداخلت تے انہاں کوں ترائے گھنٹے بعد چھوڑ ڈتا گئے ۔ترجمان دے مطابق پاکستانی سفارتکار کوں خمیس دی سویل دفتر خارجہ سڈیا گئیا اتے انہاں کوں ناپسندیدہ شخصیت آکھنڑ اتے29اکتوبر تئیں ملک چھوڑنڑ دے فیصلے بارے ڈسایا گئیا۔پاکستان الزامات مسترد کریندیں ہوئیں سفارتکار کوں حراست اچ گھنڑ اتے انہاں نال بدسلوکی کرنڑ دی شدید الفاظ اچ مذمت کیتی اے۔پاکستان آکھیا جو سفارتکار نال بدسلوکی ویانا کنونشن اتے سفارتی آداب دی خلاف ورزی اے،بھارت تنائو اچ ودھارا کر تے عالمی توجہ مقبوضہ کشمیر اچ مظالم اتے انسانی حقوق دی خلاف ورزیاں توں ہٹنڑ دی کوشش کریندا پئے۔