نواسہ رسولۖ اتے انہاں دے ٹبر مسلماناں دے اتحاد اتے نظریے کوں بچاونڑ دے عظم مقصد سانگے قربانی ڈتی ہئی ۔مسلیں دے حل سانگے اسوہ شبیری توں رہنمائی گھننڑ دی لوڑ ہے ،
اسلام آباد ۔ 12 اکتوبر (اے پی پی) صدرمملکت ممنون حسین آکھیا ہے جو نواسہ رسولۖ اتے انہاں دے ٹبر مسلماناں دئے اتحاد اتے نظریہ کوں بچاونڑ دے عظیم مقصد سانگے قربانی پیش کیتی ہئی ، مسلیں دے حل سانگے اسوہ شبیری توں رہنمائی گھننڑ دی لوڑ ہے ، امام عالی مقام اتے انہاں دے ساتھیں دی عظیم قربانیاں توں روشنی حاصل کرتے شدت پسندی اتے باہرلی جارحیت دی طرح دے خطریں نال نبڑیا ونج سگدا ہے ۔یوم عاشور دے موقع تے قوم دے ناں سنھیے اچ صدر مملکت ممنون حسین آکھیا جو 10محرم دا ڈینھ اسلام دی تاریخ اچ ہی نی جڈاں جو پوری دنیا دی تاریخ دا ہک اہم ڈینھ ہے ۔کیوں جو ایں ڈینھ نواسہ رسول ۖ اتے انہاں دے ٹبر ہک عظیم مقصد سانگے قربانی ڈتی ہئی ۔صدر آکھیا جو اے ڈینھ اساں کوں اہل بیت عظام تے تھیونڑ آلے حادثے دی یاد ہی نہیں ڈویندا جڈاں جو اے سبق وی ڈیندے جو جیں ویلھے نظریہ اتے مقصد خطرے اچ ہووے ایندے سامنڑے کہیں وی چیز دی اہمیت کائنی رہندی ،اے ڈینھ اساکوں یاد ڈویندے جوں جڈاں اسلام دی آفاقی اقدار نظر انداز تھی ونجے اتے ذاتی مفاد کوں اہمیت ڈتی ونجے تاں ایندے نتیجے اچ سماجی انصاف خطرے اچ ہوندے ۔ ایں سانگے امام عالی مقام اتے انہاں دے ٹبر دیاں قربانیاں دی یاد منیندے ہوئیں اساکوں حقیقت ہمیشہ سانگے سامنڑے رکھنڑی چاہیدی ہے ایں جدو جہد دا ہک مقصد رضائے الٰہی حاصل کرنڑ ہئی ۔ایںسانگے ضروری ہے جو اساں اپنڑے مسلیں دے حل سانگے اسوہ شبیری توں رہنمائی گھنوں ،صدر مملکت آکھیا جو ایں عظیم قربانی دا ہک بیا اہم مقصد ا ے وی ہا جو مسلماناں کوں تقسیم تھیونڑ توں بچا تے ہک مٹھ رکھیا ونجے ،اج اساکوں ایں عظیم قربانی دی روشنی اچ شدت پسندی تے باہرلی جارحیت جیہوجے خطریں نال نبڑ سگدے ہیں ۔صدر آکھیا جو انہاں سارے مسلیں نال نبڑنڑ دا ہکو طریقہ ہے جو قوم قرآنی تعلیمات دے مطابق اللہ سئیں ری رسی کوں پکا کرتے پکڑ گھنن تے کھنڈ پنڈ نہ ونجن ۔عاشورہ محرم دا پیغام وی ایہو ہے اتے امام عالی مقام حضرت امام حسین رضی اللہ تعالی عنہ دی تعلیمات دا خلاصہ وی ایہو ہے ۔
