قومی اسمبلی اقلیت نال تعلق رکھنڑ آلیاں تریمتاں دے مذہب دی جبراً تبدیلی اتے انہاں نال زبر دستی شادی دے حوالے نال متفقہ قرارداد دی منظوری

اسلام آباد ۔4اکتوبر(اے پی پی) قومی اسمبلی اچ اقلیتاں نال تعلق رکھنڑ آلیاں تریمتاں دے مذہب جبراً تبدیلی اتے انہاں نال زبر دستی شادی دے حوالے نال متفقہ قرار داد دی منظوری ڈے ڈتی ہے ۔منگل کوں قومی اسمبلی اچ لال چند ملہی قرار داد پیش کیتی جو ایں ایوان دی صلاح ہے جو حکومت اقلیت نال تعلق رکھنڑ آلیاں تریمتاں دے مذہب جبرا تبدیلی اتے جبری شادی کرنڑ کوں روکنڑ سانگے وختی اقدم چاوے ۔لال چند آکھیا جو پیپلز پارٹی اتے مسلم لیگ ن اپنڑے اپنڑے انتخابی منشور اچ وعدہ کیتا ہا جو ایندے تے قنون بنڑایا ویسی مگر ایویں کائنی تھیا ایں سانگے قرار داد منظوری کیتی ونجے ۔خواجہ سہیل منصور آکھیا جو غیر مسلم پاکستانیاں دی اے شکایت درست ہے ،سارے مذہب دے لوکاں دے حقوق دا تحفظ یقینی بنڑایا ونجے ۔پارلیمانی سیکر ٹری خلیل جارج آکھیا جو ایں حوالے نال بل پیش تھی گیا ہے ،قرارداد دی ضرورت کائنی ۔لال چند ملہی آکھای جو قرار داد حکومت دے خلاف کائنی اے منظور تھیونڑیں چاہیدی ہے ۔ڈاکٹر عذرا افضل آکھیا جو ایں قرار داد منظور کرنڑ اچ کوئی حرج کائنی غیر مسلم پاکستانیاں دے نال زیادتی دا ازالہ تھیونڑاں چاہیدا ہے ۔جمشید دستی آکھیا جو فاضل رکن کوں ڈساونڑاں چاہیدا ہے جو کیرھی جاہ تے مذہب تبدیل کرنڑ سانگے طاقت دا استعمال تھیا ہے یا جبر کیتا گیا ،تبلیغ مسلماناں دا حق ہے ،فاضل رکن ثبوت ڈیون اتے سیاسی پوائنٹ سکورنگ نہ کیتی ونجے ۔خلیل جارج آکھیا جو اساں ایندی مخالف کائنی کریندے ایں کوں وی کمیٹی دے حوالے کیتا ونجے ،وفاقی وزیر زاہد حامد آکھیا جو حکومت ایندے تے قنون لاونڑ چاہندی ہے اساکوں قرار داد منظور کرنڑ اچ کوئی اعتراض کائنی ۔ڈپٹی سپیکر قرار داد ایوان اچ منظوری سانگے پیش کیتی جیں کوں ساریں دی صلاح نال منظور کر گھدا گیا ۔