مسلم لیگ (ن) دے قائم مقام سیکرٹری جنرل احسن اقبال پارٹی دی کارکردگی رپورٹ مرکزی کونسل دے اجلاس اچ پیش کیتی

اسلام آباد ۔ 18 اکتوبر (اے پی پی) مسلم لیگ (ن) دے قائم مقام سیکرٹری جنرل اتے وفاقی وزیر احسن اقبال آکھے جو جیکر کوئی سمجھدے جو کجھ ہزار لوکاں دی تَڈ تے سیاست کریسی تاں اے اوندی خام خیالی ہے ۔ 2013ء دے مقابلے اچ 2016ء دا پاکستان مختلف ہے، اے تبدیلی دیاں اصل علامات ہن ۔ اساں مضبوط معیشت اتے مستحکم پاکستان دے تصور اُتے یقین رکھیندے ہئیں ۔ قائم مقام سیکرٹری جنرل احسن اقبال پارٹی دی کارکردگی رپورٹ مرکزی کونسل دے اجلاس اچ پیش کریندے ہوئیں آکھیا جو مسلم لیگ (ن) دے قائد نوازشریف قائداعظم دے اصولاں دے مطابق پارٹی اتے ملک کوں گھن تے ٹردے پئے ہن ۔ 1999ء دے بعد اساڈی جماعت نواں سفر شروع کیتے ، اساڈے قائد دی سوچ ہے جو پاکستان اچ ہمیشہ جمہوریت کوں مستحکم بنڑایا ویسی ۔ اساڈی جدوجہد نال آمر رخصت تھیا اتے ملک اچ جمہوریت دا سفر شروع تھیا۔ 2008ء دے بعد مسلم لیگ (ن) کوں بہوں سارے اہم سنگ میل پار کرنڑ یں پئے ، اساں میثاق جمہوریت دی تعبیر دے تحت جدوجہد کیتی اتے اقتدار دی نہیں اقدار دی سیاست کیتی اتے 2013ء تئیں حکومت کوں مدت پوری کرنڑ ڈتی اتے ملک دی تریخ اچ پہلی واری پرامن انتقال اقتدار دا مرحلہ پورا تھیا۔ اساں جمہوری نظام دے تحت 2013ء دے انتخابات دے بعد کے پی کے اچ حکومت بنڑا سگدے ہاسے ، جڈانجو اساں اقتدار دی بجائے اقدار دا خیال رکھیا۔ آزاد کشمیر اچ عددی اکثریت ہونڑ دے باوجود اساں حکومت کائنی بنڑائی ۔ اساڈا نظریہ ہئی جواساں کھلے میدان اچ جمہوری طریقے نال کامیابی حاصل کریسوں۔ دہشت گردی دے خلاف جنگ کامیابی نال توڑ پجدی پئی ہے ۔ گزریل ہک سال توں لوڈ شیڈنگ گھٹ تھیندی پئی ہے ، توانائی دے شعبے اچ تریخ دی ساریاں توں وڈی سرمایہ کاری، 2013ء توں 2016ء تئیں حکومت تعلیم کیتے 215 ارب روپے رکھے ہن۔ اے ساریاں تبدیلی دیاں علامتاں ہن ۔