اقوام متحدہ۔ 20 اکتوبر (اے پی پی) پاکستان اسرائیل ولوں مقبوضہ مغربی کنارے وچ 300نویاںیہودی وستیاں بنڑاونڑ دے اعلان کوں مسترد کریندے ہوئیں ایکوں بین الاقوامی طور تے تسلیم شدہ حل یعنی ڈو ریاستان دے قیام دے منصوبے کوں سبوتاژ کرنڑ دے مترادف قرار ڈتا ہے۔ اقوام متحدہ دی سلامتی کونسل وچ مسئلہ فلسطین بار ے بحث وچ حصہ گھندے ہوئیں اقوام متحدہ وچ پاکستان دی مستقل مندوب ڈاکٹر ملحیہ لودھی آکھیا ہے جو پاکستان دے نزدیک مشرق وسطیٰ وچ پائیدار امن سانگے 1967توں پہلے دیاں سرحداں دے مطابق ہک آزاد اتے خود مختار فلسطینی ریاست دا قیام ضروری ہے جیندا دارالحکومت بیت المقدس ہوئے۔ انہاں آکھیا جو فلسطین تے غاصبانہ اسرائیلی قبضہ اتے فلسطینی باشنداں کوں حق خود ارادیت توں محروم رکھنڑ خطے وچ بے سکونی اتے بحرانی کیفیت دا بنیادی سبب ہے۔ ڈاکٹر ملحیہ لودھی آکھیاجو اسرائیلی آباد کاری کوں روکنڑ وچ سلامتی کونسل دی ناکامی نال اسرائیل دی ہٹ دھرمی وچ ہور زیادہ ودھارا تھیا ہے ۔ انہاں آکھیا جو شام دی سنگین صورتحال دی وجہ نال انسانی مشکلاں وچ ودھارا تھیا ہے اتے متعدد لوک بے گھر تھی گئے ہن اتے انہاں مہاجرت اختیار کرنڑ تے مجبور تھیونڑ پئے۔ انہاںداعش اتے بئے شدت پسند گروہواں کوں مکاونڑ سانگے زور ڈیندے ہوئیں آکھیا جوشام دی جغرافیائی حدود دا تحفط لازمی ہے۔ انہاں آکھیا جو انہاں کوں یقین ہے جو بین الاقوامی فوجی اتحاد عراق توں داعش کوں کڈھ ڈیسی۔ ڈاکٹر ملحیہ لودھی دا آکھنڑ ہا جو داعش اتے ایندے جئے عناصر کوں مکاونڑ سانگے فوجی اقدامات دے نال نال سیاسی بصیرت اتے حکمت عملی دی وی ضرورت ہے۔ تاں جو 2003ءتوں مشکلاں دے شکار عراق وچ مختلف نسلی اتے مذہبی گروہواں وچال جاری تنازعاں کوں افہام تے تفہیم نال حل کرتے دیرپا امن دی بنیاد رکھی ونج جا سگے۔ انہاں آکھیا جو یمن وچ امن دی بنیاد رکھنڑ سانگے ہک ایجھانظام ضروری ہے جیرھا یمن دے سارے سیاسی، مذہبی اتے قبائیلی طبقیاں وچال اتحاد اتے مصالحت قائم رکھ سگے اتے جیکوںبین الاقوامی حمایت حاصل ہوئے۔
