اسلام آباد ۔ 25 اکتوبر (اے پی پی) عالمی مالیاتی فنڈ (آئی ایم ایف) دی منیجنگ ڈائریکٹر کرسٹین لا گارڈ پاکستان کوں معاشی اصلاحات پروگرام دے کامیابی نال پورے تھیونڑ اُتے مبارخ ڈتی آتے آکھیاجوچنگے معاشی استحکام اتے مضبوط سرکاری مالیات توں معیشت کوں ٹھوس بنیاد ملی گئی ہے ۔ آئی ایم ایف پاکستان دے معاشی چیلنجاں نال نبڑنڑ اتے آپنڑیں وسیع معاشی امکانات کوں استعمال اچ گھن آونڑ دیاں کوششاں دی بھرپور حمایت کریندے ۔ پالیسی مکالمہتے استعداد کاری بارے اساڈی رفاقت جاری راہسی ۔ او منگل کوں آپنڑیں دورہ پاکستان دے پورے تھیونڑ اُتے وفاقی وزیر خزانہ سینیٹر اسحاق ڈار دے نال پریس کانفرنس نال خطاب کریندی پئی ہے ۔ انہاں وزیراعظم نواز شریف‘ وزیر خزانہ اسحاق ڈار‘ مرکزی بینک دے گورنر اشرف وتھراا تے بئے اعلیٰ سرکاری حکام نال گالھ مہاڑ کیتی۔ انہاں آکھیا جو آئی ایم ایف دے تعاون نال چلنڑ آلے معاشی اصلاحاتی پروگرام دے کامیابی نال پورے تھیونڑ اُتے پاکستان کوں مبارخ پیش کریندی ہاں ۔چنگے معاشی استحکام اتے نال ہی طاقت اتے باہرلے بفرز اتے مضبوط سرکاری مالیات توں معیشت کوں ہک ٹھوس بنیاد ملسی ۔ بہوں ساریاں ٹیکس دیاں چھوٹاں اتے رعایتاں مکا ڈتیاں گئن، اتے بلند ٹیکس محاصل نال سرکاری سرمایہ کاری اتے سماجی اخراجات اچ ودھارا ممکن تھئے۔ ترائے سال پہلے دے مقابلے اچ ہدفی سماجی معاونت توں فیدہ چاونڑ آلے غریب ٹبراں دی تعداد 1.5 ملین ودھ گئی ہے ۔ بجلی دی بندش دا سلسلہ حولے حولے گھٹ تھئے ، اتے بجلی دے سیکٹر دی مالی کارکردگی مضبوط تھیندی پئی ہے ۔ کرسٹین لا گارڈ آکھیا جو بہوں کجھ حاصل کرگھدا گئے اتے بہوں کجھ حاصل کرنڑاں حالی باقی ہے ۔ ایں سانگے اے پاکستان کیتے ہک سنہری موقعہ ہے جواو باقی معاشی چیلنجاں نال بھرپور طورتے نبڑے اتے نجی شعبے اچ بئے روزگار پیدا کرنڑ اتے معاشرے دے سارے طبقیاں دے معیار زندگی کوں بلند کرنڑ دی بنیاد رکھے ۔
