اسلام آباد ۔ 24 اکتوبر (ے پی پی) وزیراعظم محمد نواز شریف آکھیا جو پاکستان امن پسند ملک اے اتے آپنڑے سارے ہمسایاں نال دوستانہ تعلقات برقرار رکھنڑ دی پالیسی تے کاربند اے،مقبوضہ کشمیر دا تنازعہ پاکستان اتے بھارت وچال بنیادی مسئلہ اے اتے ایں دے حل نال خطے اچ پائیدار امن یقینی تھیسی۔انہاں اے گالھ برطانیہ دے قومی سلامتی دے مشیر سر مارک لائل گرانٹ نال گالھ مہاڑ کریندیں ہوئیں آکھی جنہاں سوموار کوں ایوان وزیر اعظم اچ انہاں نال ملاقات کیتی۔وزیر اعظم محمد نواز شریف آکھیا جو بھارتی حکومت ولوں کیتے گئے وعدیاں دے مطابق مسئلہ کشمیر کوں اقوام متحدہ دی قرارداداں دے تحت حل تھیونڑاں چاہیدا اے۔انہاں آکھیا جو عالمی برادری کوں مقبوضہ کشمیر اچ بھارتی فوج دے مظالم اتے انسانی حقوق دی سنگین خلاف ورزیاں دا نوٹس گھنڑاں چاہیدا اے۔انہاںآکھیا جو اے بہوں چنگا ویلھا اے جو مقبوضہ کشمیر دا پرانڑاں مسئلہ کشمیری عوام دی امنگاں دے مطابق حل تھیونڑاں چاہیدا اے جئیں دی ضمانت اقوام متحدہ دی قرارداداں اچ ڈتی گئی اے۔انہاں آکھیا جو گزریل کجھ مہینیاں اچ100توں ودھ بے گناہ کشمیریاں کوں وحشیانہ طور شہید کیتا گئے ،چھرے آلی بندوقاں نال سینکڑاں کوں بینائی توں محروم کر ڈتا گئے جڈانجو پنجاہ ہزار بندے زخمی تھیے۔ایں موقع تے برطانوی قومی سلامتی دے مشیر سر مارک لائل گرانٹ دہشت گردی دے خلاف جنگ اچ قربانیاں تے خراج تحسین پیش کریندیں ہوئیں ایں جنگ اچ قابل ذکر کامیابیاں حاصل کرنڑ تے حکومت دی تعریف کیتی۔
