رحیم یار خان ۔ 21 اکتوبر (اے پی پی)وزیراعظم محمد نوازشریف آکھیا جو حکومت ملک اچ عوام کوں سہولتاں ڈیونڑ سانگے اقدامات کریندی پئی اے اتے ایں سانگے ادھا بجٹ وی خرچ کرنڑاں پئیاں تاں کریسوں،سرکاری اتے پرائیویٹ ہسپتالاں اچ غریباں دا مہانگا علاج وی سرکاری خرچے تے کرایا ویسی،غریباں دی فلاح تے بہبود سانگے اقدامات تے اللہ کوں جواب ڈیونڑاں اے،پورے ملک اچ پنجاہ نویں ہسپتال بنڑائے ویسن،ملتان توں سکھر موٹروے تے کم تھیندا پئے،رحیم یار خان کوں وی ایں نال فائدہ تھیسی،موٹرویز بنڑنڑ نال فاصلے گھٹ تھی ویندن اتے فاصلے گھٹ تھیونڑ نال جہالت اتے پسماندگی ختم تھیندی اے اتے لوک ہک ڈوجھے دے نیڑے امدن،اساں اداریاں کوں بہتر کیتے ،دہشت گردی دے خلاف جنگ لڑی،کراچی دے حالات اتے معیشت کوں ٹھیک کیتا،پٹرول اتے بجلی دے نرخ گھٹ کیتے۔انہاں اے گالھ جمعہ کوں وزیر اعظم دے قومی صحت پروگرام دے اجراء دی تقریب نال خطاب کریندیں ہوئیں آکھی۔وزیر اعظم مستحقین اچ قومی صحت کارڈ ونڈ کراہیں پنجاب اچ ایں پروگرام دا باضابطہ آغاز کیتا۔وزیر اعظم آکھیا جو حکمراناں کوں ایجھے غریب لوکاں دے علاج معالجے بارے سوچنڑاں چاہیدا اے جئیں ڈے رہنڑ سانگے گھر تئیں کائنی اتے مزدوری کر تے آپنڑاں ویلھا لنگھیندن،حکمراناں کوں ساریاں توں پہلے اللہ کوں حساب ڈیونڑاں پمسی،ایں سانگے میں ساری توجہ ایں کم تے لیساں۔انہاں آکھیا جو حکومت صحت پروگرام دے نال نال ملک اچ پنجا ہ ہسپتال وی بنڑیندی پئی اے۔انہاںآکھیا جو اسلام آباد، مظفر آباد، کوٹلی، کوئٹہ، سکردو، رحیم یار خان اچ اے پروگرام شروع تھی گئے اتے 3لکھ90ہزار ٹبر انرول تھی چکین ۔وزیر اعظم،وزیر اعلیٰ پنجاب شہباز شریف دا وی شکریہ ادا کیتا اتے انہاں کوں عوامی فلاحی بہبود خصوصی طور صحت دے شعبے اچ ذاتی نگرانی کرنڑ تے شاباش ڈتی۔
