وزیر اعظم محمد نواز شریف آذربائیجان دا ترائے ڈینھ دا دورہ پورا کرنڑدے بعد اسلام آباد روانہ تھی گئے

باکو۔15 اکتوبر (اے پی پی) وزیر اعظم محمد نواز شریف آذربائیجان دا ترائے ڈینھ دا دورہ پورا کر تے چھنڑ چھنڑ کوں اسلام آباد روانہ تھی گئے ۔ ہوائی اڈے اُتے آذربائیجان دے ڈپٹی وزیر اعظم علی احمدوف وزیر اعظم اتے اعلیٰ سطح دے وفد کوں الوداع کیتا ۔ صدر آذربائیجان الہام علیوف دی دعوت تے وزیر اعظم محمد نواز شریف دا اے آذربائیجان دا پہلا دورہ ہئی ۔ دورے دے دوران وزیر اعظم آذربائیجان دے صدر نال ملاقات کیتی اتے ڈو طرفہ تعاون ودھاونڑ نال امور اُتے تبادلہ خیال کیتا ۔ڈوہائیں اگوانڑاں خطے اچ امن کیتے آپنڑیں تصور بارے سانجھی پریس کانفرنس وی کیتی ۔ ایندے علاوہ دفاعی اتے اقتصادی تعاون ودھاونڑ تے وی اتفاق کیتا گیا ۔ آپنڑیں آذری ہم منصب نال ملاقات اچ توانائی ، دفاع اتے معیشت دے شعبیاں اچ تعاون کوں بیا مستحکم بنڑاونڑ تے تبادلہ خیال کیتا گیا ،ڈوہائیں رہنماوا ں اقوام متحدہ دی سلامتی کونسل دیاں قرارداداں دے مطابق مسئلہ کشمیر دے پر امن حل دی لوڑ تے زور ڈتا۔ وزیر اعظم نوازشریف کوں عالمی امن ، ترقی اتے ڈوہائیں مالکاں وچال باہمی تعلقات کوں مستحکم بنڑاونڑ کیتے انہاں خدمات دے اعتراف اچ باکو سیٹیٹ یونیورسٹی ولوں ڈاکٹریٹ دی اعزازی ڈگری وی ڈتی گئی ، چھنڑ چھنڑ کوں وزیر اعظم آذربائیجان دی پارلیمنٹ ملی مجلس دا دورہ کیتا جتھاں سپیکر اوگتے اسدوف انہاں کوں پارلیمنٹ دے امور بارے ڈسایا۔ وزیر اعظم وفد دے نال سپیکر ملی مجلس نال ملاقات وی کیتی ۔ وزیر اعظم آذربائیجان د ے سابق صدر حیدر علیوف دے مزار تے پھلاں دی چادر چڑھائی ۔ انہاں آذربائیجان دی آزادی دے تحریک اچ جدوجہد آزادی اچ شہید تھیونڑآلیاں دیاں قبراں تے وی حاضری ڈتی اتے انہاں کوں خراج عقیدت پیش کیتا۔