اسلام آباد ۔16 اکتوبر (اے پی پی) وفاقی وزیر اطلاعات ، نشریات وقومی ورثہ سینیٹر پرویز رشید آکھے جو 1951ءتوں شروع تھیونڑآلی پاکستان اتے چین دے سفارتی تعلقات دی بنیاد مساوات ، بھائی چارے ، باہمی احترام اتے ہرشعبے اچ تعاون تے محیط ہے ،ڈوہائیں ملکاں وچال دوستانہ تعلقات دنیا اچ ساریاں توں اُچے ، سمندراں دی گہرائی توںوی گہرے اتے ماکھی توں ودی ودھ میٹھے ہن ، چین اتے پاکستان وچال ثقافتی تعلقات روایتی ریاستی گانڈھے توں وی ودھ ہونڑیں چاہیدے ہن ۔ او اتوار کوں اتھاں پاک چائنا فرینڈ شپ سینٹر اچ تھیونڑآلے ثقافتی شو نال خطاب کریندے پئے ہن ایں موقعے تے پاکستان اچ چین دے سفیر سن ویڈانگ اتے ننگشیاءدے نائب گورنر وانگ ہیشان وی خطاب کیتا جڈانجو سفارتی تعلقات دی 65ویں سالگرہ دی مناسبت نال تھیونڑآلی کارریلی دے شرکاءاتے وڈی تعداد اچ حاضرین وی موجود ہن ۔ وزیر اطلاعات آکھیا جو اج دا ڈینھ پاکستان اتے چین وچال گانڈھے اچ نابھلاونڑ آلی اتے منفرد حیثیت رکھیندے ۔کار ریلی اتے چین توں آونڑآلے فنکاراں کوں خوش آمدید آکھدے ہوئیں انہاں ننگشیاء دے نائب گورنر وانگ ہیشان کوں کار ریلی دے انعقاد تے خراج تحسین پیش کریندے ہوئیں آکھیا جو انہاں دی ذاتی طور تے اتھاں موجودگی ڈوہائیں ملکاں وچال سفارتی تعلقات دی اہمیت سامنڑیں آندی ہے ۔
