اسلام آباد ۔02 اکتوبر (اے پی پی)پاکستان اتے چین دی قیادت اقتصادی راہداری دے وڈے منصوبے تے جاری کم دی اگوہیں نال مطمئن ہے، سی پیک دے تحت چھوٹی مدت دے منصوبے 2020ء تئیں پورے کر گھدے ویسن جڈانجو درمیانی مدت دے منصوبے 2025ء اتے لمبی مدت دے منصوبے 2030ء تئیں پورے تھیسن۔ توانائی دے ترقیاتی منصوبیاں دے پورے تھیونڑنال ڈوہائیں ملکاں وچال صنعتی گانڈھے کوں ودھارا ملسی ، اتے اقتصادی ترقی دیاں نویاں راہواں کھلسن۔ ڈوہائیں ملکاں دے ٹرانسپورٹ انفراسٹرکچر جوائنٹ ورکنگ گروپ دے فیصلے دی روشنی اچ اتفاق کیتا گیا ہئی جو کاشغر کوں گوادر نال جوڑنڑ سانگے ہک راہداری اتے مختلف زمینی رستے اختیار کیتے ویسن،جڈانجو مغربی تے شمال مغربی علاقیاں دی معاشی تے اقتصادی ترقی کیتے مغربی رستے تے ترجیحی بنیاداں تے کم کیتا ویسی ۔ پلاننگ کمیشن دے ترجمان اے پی پی کوں ڈسایا جو مغربی روٹ ہکلہ توں شروع تھی تے ڈیرہ اسماعیل خان،ژوب،کوئٹہ،سوراب اتے ہوشاب توں تھیندا ہویا گوادر نال ونج ملدے ۔ مغربی روٹ دے مختلف حصیاں اچ ہکلہ توں ڈیرہ اسماعیل خان دے 285 کلومیٹر لمبے حصے تے کم جاری ہے ۔ منصوبے کوںویلھے سر پورا کرنڑ سانگے ایں کوں پنج حصیاں اچ ونڈیا گئے ،جنہاں اچوں چار حصیاں تے پہلے ہئی کم ذمے لاڈتا گئے۔ انہاں ڈسایا جو اے موٹروے پنڈی گھیب،سواں،میانوالی،روکھڑی اتے رحمانی خیل توں لنگھ تے یارک پجسی ، یاں منصوبے کوں انشاء اللہ ڈوسال اچ 129 ارب روپے دی لاگت نال پورا کر گھدا ویسی ۔ اے چارلین موٹروے ہوسی جیکوں مستقبل اچ آسانی نال چھی لین تئیں توسیع ڈتی ونج سگسی ۔ ڈیرہ اسماعیل خان۔ژوب شاہراہ کو ں ڈو رویہ کرنڑ دے فزیبلٹی اتے ڈیزائن پورے تھی گئے ہن جڈانجو منصوبے کیتے درکار زمین گھنڑ سانگے حکومت خیبر پختونخوا اتے بلوچستان کو ںپٹھ ڈتا گئے ۔ 81 کلومیٹرلمبی ڈیرہ اسماعیل خان۔ژوب دا درجہ ودھاونڑ سانگے کم شروع کرڈتاگئے۔ اے منصوبہ جولائی 2018ء تئیں پورا تھی ویسی ۔
