پاکستان بین الاقوامی مارکیٹ اچ ہک ارب ڈالر مالیت دے سکوک بانڈ دا اجرا کر ڈتا وفاقی وزیر خزانہ سینیٹر اسحاق ڈار دی پریس کانفرنس

اسلام آباد ۔ 6 اکتوبر (اے پی پی) پاکستان بین الاقوامی مارکیٹ اچ ہک ارب ڈالر دی مالیت دے سکوک بانڈ دا اجرا کر ڈتا ہے ۔انٹرنیشنل سکوک 5.5 فیصد دی گھٹ ترین شرح منافع توں پنج سال دے عرصے سانگے جاری کیتا گیا ہے ۔ایں گالھ د ااعلان وفاقی وزیر خزانہ اسحاق ڈار خمیس کوں اتھاں پریس کانفرنس دے دوران کیتا ۔انہاں آکھیا جو پاکستان دے انٹر نیشنل سکوک 2016دے اجراءدے سلسلے اچ وفاقی سیکر ٹری خزانہ تے گورنر سٹیٹ بنک آف پاکستان تے مشتمل ٹیم دبئی ،لندن ،بوسٹن ،اتے نیو یار ک اچ روڈ شو دا انعقاد کیتا تے متوقع سرمایہ کاراں دے نال کامیاب اجلاس منعقد کیتے ۔انہاں آکھیا جو سکوک بانڈ سانگے روڈ شو دا انعقاد جوائنٹ لیڈ منیجر شامل سٹینڈرڈ چارٹرڈ بنک، سٹی بنک، ڈوئچے بنک، دبئی اسلامک بنک اتے نور بنک دے نال رل تے کیتا گیا ہے ۔ وزیر خزانہ آکھیا جو بک بلڈنگ دے عمل اچ 124 سرمایہ کار اداریں حصہ گھدا ۔ انہاں آکھیا جو بھارتی جارحیت توں لائن آف کنٹرول تے پیداتھیونڑ آلی صورت حال نال بانڈ دی قیمت تے اثر پیا ہے تاں جو اساں 5.5 فیصد دی شرح نال ہک ارب ڈالر دی پیشکش قبول کیتی ہے ،ساڈھے چھی توں ست فیصد شرح منافع دی گالھ تھیندی پئی ہی لیکن اساں فیصلہ کیتا جو درست قیمت ملسی تاں ہوںویلھے ہی سکوک جاری کیتا ویسی ۔انٹر نیشنل مارکیٹ اچ پاکستانی دی موجودگی کوں یقینی بنڑاونڑ اتے ملکی مفاد سانگے 5.5فیصد دی حتمی شرح مقرر کیتی گی جیرھا جو ملکی تاریخ دی گھٹ ترین سطح ہے ۔انہاں آکھیا جو لائن آف کنٹرول تے اگر کشیدگی نہ تھیندی تاں 5.2فیصد تئیں آسگدی ہئی۔اسحاق ڈار آکھیا جو روڈ شو دے دوران سرمایہ کاراں پاکستان تے ایندی معیشت اچ ودھ ساری دلچسپی گھدی ہے انہاں پاکستان دی معاشی کاکر دگی ،ڈو رس اصلاحات اتے آئی ایم ایف دے نال پروگرام دے کامیابی نال پورا تھیونڑ کوں چنگاں آکھیا ۔