جدہ ۔ 28 اکتوبر (اے پی پی) پوری دنیا آلی کار جدہ وچ وی کشمیروچ بھارتی فوج دے مظالم دے خلاف یوم سیاہ منایا گیا۔ ایں موقع تے پاکستان کشمیرکمیٹی دے زیر انتظام پاکستان قونصلیٹ وچ ہک تقریب منعقد تھئی جیندے وچ پاکستانی کمیونٹی دی وڈی تعداد موجود ہائی۔ایں موقع تے قونصل جنرل شہریاراکبر آکھیا جو بھارت کشمیروچ ظلم تے ستم دی انتہا کرڈتی ہے، حکومت پاکستان مسئلہ کشمیر کوں سارے عالمی اداریا ں وچ پرزور انداز وچ چیندی پئی ہے ، جنرل اسمبلی وچ وزیراعظم محمد نواز شریف دا خطاب، او آئی سی دے سارے فورماں، حال وچ نیویارک، تاشقند وچ تھیونڑآلے اجلاساں وچ وی ایں مسئلے تے پرزور قراردادں پیش کیتیاں ہن، ایہ عالمی برادری کوں جگاونڑ دیاں کوششاں ہن۔ انہاں آکھیا جو ہر بندے کوں چاہیدے جو اوہ سوشل میڈیا اتے اپنڑے فورم دے ذریعے دنیا کو ںبھارتی مظالم بارے آگاہ کرین۔ کشمیر کمیٹی دے صدرمسعود احمد پوری اپنڑے خطاب وچ آکھیا جو کشمیرکمیٹی اپنڑیاں ساریاں کوششاںجاری رکھیسی اتے قونصلیٹ دے تعاون نال مسئلہ کشمیرکو ںاجاگر کرنڑ وچ مصروف ہے۔ کشمیرکمیٹی دے رہنما غلام نبی بٹ اپنڑے خطاب وچ آکھیا جو برہان وانی دی شہادت دے بعد شہادتاں دا سلسلہ چل نکلیاہے اتے بزدل بھارتی سکیورٹی فورسز روزانہ نہتے نوجواناں کو ںشہید کریندیاں پن، پیلٹ گن دے استعمال دے نتیجے وچ سینکڑاں کشمیری بینائی توں محروم تھئے ہن ، ہنڑ ا وہ ڈینھ دور کائنی جڈاں بھارت دے ٹکڑے تھیونڑ آلے ہن ، کشمیر ظلم و ستم دا بازار گرم کرنڑ آلیاں دا قبرستان ثابت ہوسی۔ تقریب وچ صدر پاکستان اتے وزیراعظم دے پیغامات پڑھ تے سنڑائے گئے۔
