اسلام دنیا اچ سارے توں وختی تکھے کھنڈ ونجنڑ آلا مذہب ہے

لندن ۔ 2 نومبر (اے پی پی) دنیا دے سارے مذہباں دے مقابلے وچ اسلام ساریں توں ودھ تکھے کھنڈداپئے اتے کجھ سالاں بعد اے عیسائیت کوں پیچھی تے چھوڑ ڈیسی۔ ایہ گالھ ورلڈ اکنامک فورم دے پیو ریسرچ سینٹر دی ہک تحقیق دے حوالے نال ڈسائی گئی ہے ۔ تحقیق وچ ڈسایا گئے جو 2070 تئیں اسلام عیسائیت کوں پیچھی تے چھوڑ تے دنیا دا سبھ توں وڈا مذہب بنڑ ویسی ۔ تحقیق وچ 2010 وچ دنیا دے مذہباں کوں مننڑ آلیاں دی تعداد ڈتی گئی ہے اتے 2050 تئیں ایندے وچ ودھارے دا تخمینہ وی لاتا گئے جیکوںڈیکھ تے اندازہ تھیندے جو اگلے 35 سال وچ مسلماناں دی تعداد وچ ہک ارب 16 کروڑ دا ودھار تھیسی جڈانجوعیسائیت کو ںمننڑ آلیاں دی تعداد 74 کروڑ 97 لکھ تئیں ودھ سگسی۔ ایں طرح 2050 ءتئیںکہیںمذہب کوں نہ مننڑ آلیاں دی تعداد وچ وی گھٹکی آوسی جیرھی جو 2010 وچ دنیا دی مجموعی آبادی دی 16.4 فیصد بنڑدی ہے تاں جو 2050 وچ ا یہ 13.2 فیصد تئیں گھٹ تھی ویسی۔ تحقیق وچ ڈسیا گئے جو 2050 ءوچ اگرچہ دنیا دی مجموعی آبادی دا ہک تہائی حصہ عیسائیت کو ںمننڑ آلیاں تے مشتمل ہوسی تاں جو سبھ توں ودھ تکھے مسلماناں دی آبادی وچ ودھار اتھیسی جیندی وجہ بلند شرح پیدائش اتے نوجوان بندیاں دی تعداد وچ ودھارا ہے۔ ترائے دہائیاں دے دوران چین اتے جاپان وچ شرح پیدائش وچ گھٹکی دے نتیجے وچ بدھ مت کوں مننڑ آلیاں دی تعداد وچ 14 لکھ 90 ہزار دی گھٹکی آوسی ، جڈانجو یہودیاں دی تعداد وچ 22 لکھ 30 ہزار بندیاں دا ودھارا تھیسی۔ بئے چھوٹے مذاہب دے پیروکاراں دی آبادی وی 33 لکھ تئیں ودھ ویسی۔ ایجھے بندے جیرھے جو خدا کوںتاں مندے ہن پر کہیں مذہب نال جڑے ہوئے کائنی انہاں دی تعداد وچ نو کروڑ 91 لکھ نوے ہزار تئیں ودھارا تھی سگدے، ہندو مت کوں مننڑ آلیاں دی تعداد 35 کروڑ توں ودھ ودھنڑ دا امکان ہے۔تحقیق دے مطابق 2010 ءوچ 34 فیصد مسلماناں دی عمر 15 سال توں گھٹ ہائی، 60 فیصد 15 توں 59 سال وچال جڈانجو 7 فیصد سٹھ سال یا ایندے توں ودھ عمر دے ہن ، جڈانجو 30 فیصد ہندو پندرہ سال توں گھٹ عمر دے ہن جڈانجوعیسائیت وچ ایں عمر دت بندیاں دی تعداد 27 فیصد ہائی۔