اسلام آباد ۔ 09 نومبر (اے پی پی) صدر مملکت ممنون حسین تے وزیراعظم محمد نواز شریف آکھیا ہے جو حکومت ترقیاتی ایجنڈے توں اپنڑی توجہ کائناں ہٹیسی اتے ملک دی ترقی تے عوام دے زندگی دے معیار اچ چنگائی سانگے ترقیاتی منصوبے پورے کرنڑ سانگے چنگے طریقے نال کم جاری رہسی ۔انہاں اے گالھ بدھ کوں ایوان صدر اچ تھیونڑ آلی ملاقا ت اچ آکھی ۔وزیراعظم نواز شریف دی صدر مملکت نال تھیونڑ آلی ملاقات اچ ڈوہیں رہنماواں ملک دی مجموعی صورت حال تے اہم قومی امور تے گالھ مہاڑ کیتی ۔ایوان صدر ولوں جاری بیان دے مطابق ملاقات اچ پاک چین اقتصادی راہداری ،توانائی دے منصوبیں تے امن و امان ،لائن آف کنٹرول اتے مقبوضہ کشمیر اچ ورکنگ باﺅنڈری تے پیداتھیونڑ آلی صورت حال سمیت اہم امور تے گالھ بات تھی ۔وزیراعظم صدر مملکت کوں حکومت ولوں اقتصادی تے عوام فلاح بہبود دے ضمن اچ کیتے ونجنڑ آلے اقدامات بارے ڈسیا ۔صدر مملکت حکومت دیاں معاشی پالیسیاں کوں چنگاں اکھیندے ہوئیں آکھیا جو انہاں پالیسیاںدی وجہ نال قومی معیشت مضبوط تھی ہے اتے ایندے اثرات عام آدمی تئیں پجدے پئے ہن ۔صدر مملکت پاکستان دی اقتصادی صورت ھال اچ چنگائی متعلق بین الاقوامی مالیاتی اداریں دی رپورٹ تے اطمینان دا اظہار کیتا ،صدر مملکت تے وزیراعظم پاک چین اقتصادی راہداری دی صورت حال چنگائی متعلق کم دی تکھی رفتار تے اطمینان دا اظہار کریندے ہوئیں آکھیا جو اے منصوبہ نہ صرف پاکستان بلکہ پورے خطے سانگے فائدہ مند ہے ۔ڈوہیں رہنماواں ایں عزم دا ظہار کیتا جو پاک چین اقتصادی راہداری دے عظیم الشان منصوبے نال سارے صوبے تے خطیں کوں ہکو جہے فائدے تھیسن ۔ڈوہیں رہنماواں ایں گالھ تے اطمینان دا ظہار کیتا جو سی پیک دے تحت توانائی دے منصوبیں دی ویلھے نال پورے تھیونڑ تے ملک اچ 2018اچ لوڈشیڈنگ دا خاتمہ تھی ویسی ۔صدر مملکت تے وزیراعظم اپریشن ضرب عضب دے دوران حاصل تھیونڑ آلیاں کامیابیاں تے اطمینان دا ظہار کریندے ہوئیں آکھیا جو چھیکڑی دہشت گرددے خاتمے تئیں اے اپریشن جاری رہسی ۔انہاں آکھیا جو دہشت گردی تے انتہا پسندی نال نبڑنڑ سانگے مسلح فوج تے قنون فافذ کرنڑ آلے اداریں دے افسراں تے نینگراں دیاں قربانیاں کوں خراج تحسین پیش کیتا تے ایں عزم دا اظہار کیتا جو ملک دے سارے حصیں اچ پورے امن دی بحالی سانگے اے اپریشن جاری رہسی ۔ملاقات اچ ڈوہیں رہنماواں ولوں مقبوضہ کشمیر اچ جاری مظالم دی ودھ ساری مذمت کیتی گی ۔انہاں بین الاقوامی برادری تے زور ڈتا جو کشمیر دا مسئلہ اقوام متحدہ دیاں قرارداداں دے مطابق حل کراونڑ اچ اپنڑاں کردار ادا کرن ۔
