اسلام آباد ۔ 30 نومبر (اے پی پی) وزیراعظم محمد نواز شریف ‘ پاک۔چین اقتصادی راہداری دی اہمیت کوں اجاگر کریندیں ہوئیں آکھیا جو سی پیک پاکستان دا تزویراتی معاشی اقدام اے جیڑھا جو دنیا اتے خصوصی طور خطہ سانگے بہوں ودھ کشش دا باعث اے،سی پیک منصوبہ جات دی تکمیل سانگے اساڈی کاوشاں پاکستان دے سماجی تے اقتصادی منظر نامہ کوں بدل ڈیسی۔انہاں اے گالھ بدھ کوں وزیر اعظم ہائوس اچ سی پیک تے پیشرفت بارے جائزہ اجلاس نال خطاب کریندیں ہوئیں آکھی۔اجلاس وچ توانائی،ٹرانسپورٹ،بنیادی ڈھانچہ اتے صنعت دے کئی منصوبیاں سانگے مقررہ تھئے اہداف اتے تھیونڑ آلی پیشرفت تے تفصیلی غور کیتا گئیا جڈانجو گوادر بندرگاہ دی ترقی دے نال نال سماجی تے اقتصادی بہتری دے منصوبیاں تے خصوصی توجہ ڈتی گئی۔وزیر اعظم محمد نواز شریف آکھیا جو جڈاں حکومت 2013ء اچ اقتدار سنبھالیا تاں پاکستان دی معیشت ابتری دا شکار ہئی ،ایجھے نازک موقع تے اقتصادی بحالی سانگے چین اساڈی مدد کیتی جئیں تے پاکستان دی عوام اتے حکومت چینی قیادت اتے عوام دے شکر گزار ہن ۔انہاں آکھیا جو چین دی بصیرت انگیز قیادت سی پیک دے تصور کوں حقیقت دا روپ ڈیونڑ اچ اساڈی حمایت کیتی۔جولائی2013ء اچ چین دے آپنڑے پہلے سرکاری دورے اتے تریخی دورہ دا ذکر کریندیں ہوئیں وزیر اعظم آکھیا جو اے دورہ ڈو پاسہ ایجنڈے اچ اقتصادی تعاون اتے مواصلاتی رابطیاں کوں مرکزی حیثیت ڈیندیں ہوئیں آپسی تعلقات دے ودھارے اچ ہک نواں مرحلہ عبارت رہیا۔
