گوادر ۔ 13 نومبر (اے پی پی) وزیر اعظم محمد نواز شریف آکھے جو گوادر توں پہلے کارگو جہاز دی روانگی نال پاک چین اقتصادی راہداری (سی پیک ) منصوبہ سچ تھی گئے ، کاشغر توں تجارتی قافلے دی گوادر آمد نال نویں تریخ رقم تھئی ، سی پیک نال پاکستان تجارتی اتے معاشی سرگرمیاں دا مرکز بنڑ ویسی ، اتے خطے اچ امن و سلامتی کوں فروغ ملسی ، سی پیک دے فیدے نال سارا ملک رنگیا ویسی ، کوادر اچ پیونڑ دے صاف پانڑیں دی فراہمی کیتے ساڈھے یاہراں ارب روپے خرچ کیتے ویسن۔ اے گالہیں وزیر اعظم اتوار کوں گوادر توں پہلے میگا پائلٹ ٹریڈ کارگو روانہ کرنڑ دی تقریب نال خطاب کریندے ہوئیں آکھیاں۔ وزیراعظم آکھیا جو گوادر توں پہلے تجارتی بحری جہاز دی روانگی اہم سنگ میل ہے، ایں منصوبہ نال پاکستان جنوبی ایشیائ،وسطی ایشیاءاتے چین وچال اہم تجارتی مرکز بنڑ ویسی اتے گوادر وی اقتصادی مرکز بنڑدا پئے ۔ انہاں آکھیا جو اج ہک نویں دوردا آغاز تھی گئے ۔ وزیر اعظم منصوبیاں دی تکمیل اچ آرمی چیف جنرل راحیل شریف دی ذاتی دلچسپی اُتے انہاںدا شکریہ ادا کریندے ہوئیں آکھیا جو ایف ڈبلیو او دیاں کوششاں نال سڑکاں دا جال بنڑ گئے ۔ سی پیک چینی صدر شی جن پنگ دے وژن ہک خطہ ہک سڑک کوں ظاہرکریندے ۔ انہاں آکھیا جو پاکستان کوں چین دے نال سانجھے داری اُتے ناز ہے ۔ اتے اساں چین کوں یقین ڈیوندے ہئیں جو سی پی دے تحت منصوبیاں کوں پوراکرڑ کیتے کہیں طرح دی رکاوت کوں برداشت کائناں کیتا ویسی ۔ سی پیک منصوبہ چین اتے پاکستان دیاں قیادتاں ولوں خطے اچ خوشحالی،امن تے استحکام دا ضامن ہوسی ۔ وزیر اعظم چینی صدر دے خطے بارے ترقی اتے خوشحالی دے وژن دی تعریف کیتی اتے آکھیا جو سی پیک منصوبے نال گوادر تجارتی سرگرمیاں دا مرکز بنڑ ویسی ۔ انہاں آکھیا جو گوادر اچ آذاد تجارتی زون کیتے زمین رکھی گئی ہے ۔ انہاںآکھیا جو وفاقی حکومت شہریاں دیاں سہولتاں کیتے بلوچستان اچ سڑکاں دی تعمیر اُتے 75 ارب روپے خرچ کیتے ہن جڈانجو بئے 200ارب روپے دی لاگت نال خضدار ،کوئٹہ تے ڈی آئی خان روڈ دی تعمیر اُتے خرچ کیتے ویسن۔ جوائنٹ چیفس آف سٹاف کمیٹی جنرل راشد محمود، وزیر دفاع خواجہ محمد آصف، آرمی چیف جنرل راحیل شریف،چیف آف ائر سٹاف ائر چیف مارشل سہیل امان،چیف آف نیول سٹاف ایڈمرل ذکا اللہ خان،وفاقی وزیر منصوبہ بندی احسن اقبال،قومی سلامتی دے مشیر ناصر خان جنجوعہ، نیشنل پارٹی دے سربراہ میرحاصل بزنجو اتے جمیعت علماءاسلام (ف) دے سربراہ مولانا فضل الرحمان وی وزیراعظم دے نال ہن ، ایں توں پہلے وزیراعلیٰ بلوچستان نواب ثناءاللہ خان زہری اتے وفاقی وزیر سیفران عبدالقادر بلوچ گوادر پجنڑ اتے مہماناں دا پرتپاک خیرمقدم کیتا۔
