اقتصادی راہداری تے اندردے اختلاف کوں مکاونڑاں پوسی، یار ملک کوں داخلی سیاست وچ ملوث کرنڑ غیر ذمہ داری دا ثبوت ہے، پچھلے ترائے سالاں وچ توانائی دے شعبے وچ وڈی سرمایہ کاری کیتی گئی ہے، 2018ء تئیں نیشنل گرڈ وچ 10ہزار میگاواٹ بجلی شامل تھی ویسی،
اسلام آباد ۔ 08 نومبر (اے پی پی) وفاقی وزیر منصوبہ بندی تے ترقی اصلاحات پروفیسر احسن اقبال آکھیا ہے جو اقتصادی راہداری تے اندر دے اختلافاں کوں مکا ونڑ پوسی، یار ملک کو داخلی سیاست وچ ملوث کرنڑ غیر ذمہ داری دا ثبوت ہے، پچھلے ترائے سالاں وچ توانائی دے شعبے وچ وبھ توں ودھ سرمایہ کاری کیتی گئی ہے، 2018ء تئیں نیشنل گرڈ وچ 10ہزار میگاواٹ بجلی شامل تھی ویسی ۔ انہاں خیالیں دا اظہار انہاں منگل کوں اتھاںپلاننگ کمیشن وچ وزارت منصوبہ بندی تے ترقیات اتے یو ایس ایڈ وچال توانائی سانگے مربوط سسٹم دے قیام سانگے ایم او یو تے دستخط کریندے ہوئیں کیتا۔ وفاقی وزیر آکھیا جو ایں سسٹم دامقصد ایجھاسنٹر قائم کرنڑہے جیندے نال پاکستان وچ توانائی دے شعبے وچ کارکردگی ودھاونڑ سانگے کم کیتا ویسی ، ایں سنٹر توں ملک وچ بجلی دی ترسیل دا نظام چنگا تھی ویسی ۔انہاں آکھیا جوسی پیک تے اند دے اختلافاں کوں مکاونڑ پوسی اتے دوست ملک کوں اساڈی داخلی سیاست وچ کہیں قسم دے تنازعہ بناونڑ دی ضرورت کائناں ہے۔ انہاں آکھیا جوسی پیک تے سپیکر خیبر پختونخوا اسمبلی نال گالھ تھی ہے اتے انہاں دے اختلافات دور کیتے ویسن ۔ انہاں آکھیاجو عدالتی کاروائی نال خود خیبر پختونخوادا نقصان تھیسی۔ انہاں آکھیا وج خیبر پختونخوا وچ منڈا ڈیم ، داسو ڈیم اتے قبائلی علاقیاں وچ ڈیماں تے کم تھیندا پئے ۔ انڈس ہائی وے اتے لواری ٹنل تے تکھے کم جاری ہے جیرھا جو آندے سال 2017ء تئیں عوام دی سہولت سانگے ٹریفک سانگے کھول ڈتا ویسی ، ایچ ای سی وچ خیبرپختونخوا وچ 13توں ودھ تعلیم دے منصوبے منظور کیتے ہن۔ انہاں آکھیا جوراہداری منصوبے دے دشمناں دے پراپیگنڈے وچ آتے کجھ سیاستدان منصوبے کوں منتازعہ بنڑیندے پن لیکن انہاں کوں چین اتے پاکستان دے مفاد کوں مد نظر رکھنڑچاہیدے، قنونی چارہ جوئی خود پختونخواسانگے نقصان دہ ثابت تھیسی ، اگر انہاں کوں تحفظات ہن تاں انہاں کوں میڈیااتے عدلیہ دی بجائے پارلیمانی کمیٹی وچ حل کرنڑچاہیدے۔ہک سوال دے جواب وچ انہاں آکھیا جو امریکاوچ کہیں دی وی حکومت آوے تعلقات وچ فرق کائناں پوسی کیونجو اتھاںپالیسیاں ادارے بنڑیندے ہن۔ خطے وچ امن دے قیام سانگے امریکا کوں اپنڑاں کردار ادا کرنڑچاہیدے۔ ایں موقع تے پلاننگ کمیشن ولوںسیکرٹری پلاننگ نسیم کھوکھر اتے یو ایس ایڈ دے مشن ڈائریکٹر جان گرو کے ایم او یو تے دسخط کیتے۔
