لاہور۔28 نومبر(اے پی پی )وفاقی وزیر برائے منصوبہ بندی پروفیسر احسن اقبال آکھے جو سیاسی انتشار سرمایہ کاری دی نفی ہے،کجھ عناصر سی پیک اُتے بلا ضرورت سیاست کریندے پئے ہن ، سی پیک منصوبہ ایٹمی پروگرام توں گھٹ کائنی ، ڈیکھنڑاں اے جو ہندوستان پاکستان کوں اشتعال ڈیوا تے جنگ تاں نہیں نافذ کرنڑاں چاہندا، جیکر او جنگ چاہندے تاں اوندی سازش کوں ناکام بنڑاونڑاں ہے ، کیونجو اساں خطے اچ پرامن ہمسائیگی چاہندے ہئیں جڈانجو امن دی خواہش کوں کمزوری نہ سمجھا ونجے ، ہنڑ اساکوں جنگی جنون دی نہیں جڈانجو ترقی دے جنون دی فکر ہے،سارے صوبیاں دے وزرائے اعلیٰ سی پیک منصوبے دی حمایت کیتی ہے اتے ایں منصوبے نال سارے صوبے فیدہ چیسن۔ اے گالہیں انہاں گزریل ڈینھ اتھاں پنجاب یونیورسٹی اچ سی پیک سٹڈی گروپ ولوں تھیونڑآلے سی پیک بارے سیمینار نال خطاب اتے میڈیا نال گالھ مہاڑ کریندے ہوئیں آکھی۔ احسن اقبال آکھیا جو پاکستان دے جیو سٹریٹجک فیدے کوں جیو اکنامک فائدے اچ تبدیل کریسوں، اتے آپ دے جغرافیے کوں ملکی ترقی اتے خوشحالی کیتے استعمال کیتا ویسی ۔ دنیا اچ تیزی نال ترقی تھیندی پئی ہے ، کئی وی ادارہ یا ملک ترقی دا مقابلہ نہیں کریندا تاں زوال دا شکار تھی ویندے ۔ ایں سانگے لازمی ہے جو اج دے تقاضیاں کوں سمجھا ونجے ، 20 ویں صدی سیاسی نظریات دی صدی ہئی جڈانجو 21 ویں صدی اقتصادی نظریات دی صدی ہے، ایشیا اچ ساوتھ ایشیا، چین اتے سنٹرل ایشیاء انجن آف گروتھ ہن اتے پاکستان انہاں دے ادھ اچ موجود ہے ۔ سی پیک دا دورانیہ 2014ء توں 2030ء تئیں دا مرحلہ وار منصوبہ ہے جیندے کجھ منصوبے 2020 تئیں جڈانجو ادھی مدت دے منصوبے 2025 ء تئیں اتے لمبی مدت دے منصوبے 2030 تئیں پورے تھی ویسن۔ انہاں آکھیا جو سی پیک دے ذریعے گوادر کوں ماڈل پورٹ سٹی نبڑیسوں اتے اتھاں ہوائی اڈا وی تعمیر کیتا ویسی ، احسن اقبال آکھیا جو چارہے صوبیاں اتے گلگت بلتستان اچ انفراسٹرکچر چنگا تھی ویسی ، جڈانجو حال ہی اچ گوادر توں منسلک 650 کلومیٹر طویل سڑکاں پوریا ں کر گھدیاں ہن ۔
