پاکستان ماحولیاتی تبدیلیاں دے عالمی معاہدے ”پیرس ایگریمنٹ“ دی توثیق کر ڈتی ڈاکٹر ملیحہ لودھی اقوام متحدہ دے ہیڈ کوارٹر وچ منعقدہ تقریب دے دوران دستخط آلی دستاویز جمع کرائیاں،توثیق کرنڑآلے ملکاں وچ پاکستان دا 104 واں نمبر

اقوام متحدہ ۔ 11نومبر (اے پی پی) پاکستان ماحولیاتی تبدیلیاں دے عالمی معاہدے پیرس ایگریمنٹ دی توثیق کر ڈتی ہے، معاہدے دے تحت تقریباً ہر ملک کوں ماحول سانگے نقصان دہ گیساں دے اخراج وچ گھٹکی دے اقدامات کرنڑ پوسن۔ معاہدے دی دستاویز تے صدر پاکستان ممنون حسین دستخط کیتے اتے اقوام متحدہ سانگے پاکستان دی مستقل مندوب ڈاکٹر ملیحہ لودھی اقوام متحدہ دے ہیڈ کوارٹر وچ خمیسا کوںمنعقدہ ہک تقریب دے دوران ایہ دستخط شدہ دستاویز جمع کرائیاں۔ ایندے نال ای پاکستان ایں عالمی معاہدے دی توثیق کرنڑ آلا 104واں ملک بنڑ گئے۔ معاہدے تے عملدرآمد اجوعکے مہینے شروع تھی گئے ۔ معاہدے تے عملدرآمد دے آغاز سانگے دنیا دے 55ملکاںولوںتوثیق لازمی قرار ڈتی گئی ہائی جیرھے جو ماحول سانگے نقصان دہ گیساں دے 55فیصد اخراج دے ذمہ دار ہن۔ ایہ شرط 5اکتوبر کوں پوری تھیسی ۔ معاہدے دے رکن ملاکں سانگے لازمی قرار ڈتا گئے جو ا وہ درجہ حرارت وچ ودھارے2 درجے سینٹی گریڈدی حد توں نہ ودھنڑ ڈیون ۔ا یہ معیار ماحولیاتی ماہرین اتے سائنسداناں مقرر کیتے ۔ پاکستان ولون معاہدے دی توثیق کلائمیٹ کنونشن دے مقاصد تے اہداف دے حصول سانگے پر عزم رہونڑ دااظہار ہا۔ پاکستان نویں عالمی ماحولیاتی معاہدے سانگے مذاکرات دی سرگرمیاں وچ حصہ گھدا اتے وزیر اعظم محمد نواز شریف گزریل سال دسمبروچ ہک وفد دی قیادت کریندے ہوئیں فرانس دادورہ کیتا جتھاں ایں معاہدے تے اتفاق رائے تھیا۔ پاکستان ولوںمعاہدے دی توثیق ایجھے موقع تے کیتی گئی جڈاںمراکش وچ ماحولیاتی تبدیلیاں دی کانفرنس تھیونڑ ویندی پئی ہے ، ایں کانفرنس وچ پیرس ایگریمنٹ دے مقاصد تے اہداف دے حصول سانگے پختہ عزم دا اظہار کیتا ویسی۔