پنجاب دے میدانی علاقیاں اچ ایں ہفتے دے دوران سموگ اتے کوہیڑ فضا اچ رہنڑ دا امکان ہے، ترجمان محکمہ موسمیات

اسلام آباد ۔ 08 نومبر (اے پی پی )اجوکے ہفتے اچ پنجاب دے میدانی علاقیاں اچ اسموگ اتے کوہیڑ وڈی مقدار اچ ہوا اچ راہونڑ دا امکان ہے ۔ محکمہ موسمیات دے ترجمان ڈسایا ہے جو نومبر اتے دسمبر اچ معمول توں گھٹ مینھ دی توقع ہے ایں سانگے سموگ اتے کوہیڑ دا سلسلہ جاری رہسی ۔ انہاںڈسایا جو آندے 24گھنٹے اچ ملک دے ودھ سارے علاقیاں اچ موسم رُکھا رہسی ، جڈانجو فیصل آباد، ساہیوال، گوجرانوالہ، سرگودھا، لہور، ملتان، بہاولپور ڈویژن اچ سموگ اتے دھند پونڑ دا امکان ہے ۔ محکمے دے مطابق آندے 48گھنٹے اچ ملک دے بہوں سارے علاقیاں اچ موسم رکھا راہسی ، گزریل 24 گھنٹے دے دوران ملک دے بہوں سارے علاقیاں اچ موسم رُکھا ریہا، پنجاب دے میدانی علاقیاں اچ سموگ اتے کوہیڑ پئی۔ ایں دوارن طبی ماہراں آکھیا ہے جو سموگ نال ذرات اکھیں،گلے دی خرابی اتے ساہ گھنڑ اچ اوکھ دی وجہ بنڑ سگدی ہے ، ایں سانگے لوک احتیاطی تدابیر اختیار کرن اتے ماسک دا استعمال کرن۔