امریکی سینیٹ دی خارجہ امور کمیٹی دا خطے اچ امن تے سلامتی دے فروغ اچ پاکستان دے کردار دا اعتراف

اسلام آباد ۔ 9 دسمبر (اے پی پی) امریکی سینیٹ دی خارجہ امور کمیٹی خطے اچ امن تے سلامتی کوں فروغ ڈیونڑ اچ پاکستان دے کردار دا اعتراف کریندے ہوئیں پاکستان نال ڈو طرفہ گانڈھے کوںتکڑا کرنڑ دی خواہش دا اظہار کیتے۔ جمعے کوں دفتر خارجہ دے ترجمان دے مطابق وزیر اعظم دے معاون خصوصی طارق فاطمی کیپیٹل ہل واشنگٹن اچ چیئر میں سینیٹر باب کروکر اتے رینکنگ رکن سینیٹر بن کارڈین نال ملاقات دے دوران پاکستان کیتے امداد اتے حمایت اُتے سینیٹ دی خارجہ امور کمیٹی دا شکریہ ادا کیتا۔طارق فاطمی انسداد دہشت گردی دے سلسلے اچ معاونت دی فراہمی بارے اجازت ڈیونڑ اُتے امریکی کانگریس دے کردار دی تعریف کیتی جو پاکستان کیتے فاٹا اچ دہشت گرداں دے نیٹ ورک دے خاتمے اتے خطے اچ امن تے استحکام دے فروغ اچ مددگار ثابت تھئی ۔ طارق فاطمی امریکی سینیٹ دی خارجہ امور کمیٹی کوں بھارتی فورسز ولوں مقبوضہ کشمیر اچ وڈے پیمانے تے انسانی حقوق دیاں سنگین خلاف ورزیاں اتے کنٹرول لائن اُتے بھارت دی اشتعال انگیز کارروائیاں بارے ڈسایا۔ انہاں بھارت ولوں جارحیت اتے ہٹ دھرمی پاروں جنوبی ایشیاء اچ امن دے امکانات اُتے ودھدے ہوئے منفی اثرات بارے امریکی سینٹ دی خارجہ تعلقات کمیٹی کوں بریفنگ ڈتی ۔ معاون خصوصی سینیٹرز کوں پاکستان ولوں گزریل ترائے سالیں اچ ملک اچ معیشت اتے سکیورٹی کوں چنگا بنڑاونڑسانگے کیتے گئے اقدامات بارے وی ڈسایا۔