اسلام آباد ۔ 9 دسمبر (اے پی پی) صدر مملکت ممنو ن حسین آکھیا ہے جو انتظامی ادارے بلا امتیاز اتے بنیادی فرض سمجھ تے بدعنوانی دے خاتمے سانگے اقدامات کرن تاں جو وطن عزیز کوں بہوں وختی ایں لعنت توں چھٹکا را مل سگے ۔اساکوں اللہ سئیں دی خوشنودی تے جہاد سمجھ تے بد عنوانی دے خاتمے سانگے کم کرنڑاں ہوسی ۔کرپشن دے خاتمے سانگے پوری قوم رضا کارانہ کردار ادا کرے اتے معاشرے اچ ایجھی کالی بھیڈاں دی نشاندہی کرے جیرھے ایجھیاں سرگرمیاںاچ ملوث ہوون ۔صدر مملکت اے گالھ ایوان صدر اچ انسدادِ بدعنوانی دے عالمی ڈینھ دے موقع تے خطاب کریندے ہوئیں آکھی جیں اچ وفاقی وزیرقانون تے انصاف زاہد حامد، چیئرمین قومی احتساب بیورو قمر زمان چوہدری اتے گورنر اسٹیٹ بینک اشرف محمود وتھرا دے علاوہ غیر ملکی سفیراں تے معزز مہماناں دی ہک وڈی تعداد شریک ہئی ۔صدر مملکت آکھیا جو اساڈے معاشرے دی اصل وگاڑ دی وجہ بدعنوانی اتے اختیارات د ا غلط استعمال ہے ۔بد عنوانی ہک ایجھا ناسور ہے جیں نال معاشرے دا ہک وڈا طبقہ محرومی دا شکار تھی وینداہے ۔انہاں آکھیا جو پاکستان سمیت پورے دنیا دے مختلف معاشریں اچ بد عنوانی دیاں ساریاں ذمے واریاں اہل اقتدار تے اہل اختیار تے پاونڑ درست کائنی ۔صدر مملکت آکھیا جو کہیں وی حد تئیں انہاں مسلیں دے ذمے وار حکمران تھی سگدے ہن لیکن حکمراناں دے نال نال معاشرے کوں ایں بر ی الزمہ قرار ڈیونڑ غلط ہوسی انہاں آکھیا جو ایں گالھ کوں سامنڑے رکھیا ونجے جو ریاستی ادارے تے ریاستی نظام کوںکوئی وی ضیان نہ تھیوے ۔صدر مملکت آکھیا جو اساڈی اے کوشش ایں صورت اچ کامیاب تھی سگدیہے اگراساں اتھاں مفادات توں اتے اٹھی تے صرف بد عنوانی کوں اپنڑاں ہدف بنڑاووں۔انہاں ایں موقع تے بد عنوانی دے خلف شعور اجاگر کرنڑ سانگے کلر بک جاری کرنڑ دا خیر مقدم کریندے ہوئیں آکھیا جو ایں طرح دے علامتی اقدامات نویں نسل تے معاشرے دی ذہن سازی اتے شعور بیداری دا ذریعہ بنڑ سگدے ہن ۔ایں موقع تے صدر مملکت بد عنوانی دے خاتمے سانگے اعلیٰ کاکردگی دا مظاہرہ کرنڑ آلے افسراںکوں سر ٹیفکیٹ نال نوازیا ۔
