اسلام آباد ۔ 23 دسمبر (اے پی پی) وزیراعظم محمد نوازشریف آکھے جو پاکستان اتے ازبکستان کوں معاشی تے تجارتی شعبیاں اچ تعاون اچ ودھارے کیتے کوششاں کرنڑ اتے باہمی تجارت توں بھرپور فیدہ چاونڑ دی لوڑ ہے ۔ انہاں اے گالھ جمعے کوں اتھاں وزیراعظم ہائوس اچ ازبکستان دے نائب وزیراعظم اوگبک روزی کولوف نال ملاقات اچ گالھ مہاڑ دے دوران آکھی۔ ازبک وفد دے دورہ پاکستان دا خیر مقدم کریندے ہوئیں وزیراعظم ایں اعتماد دا اظہار کیتاجو انہاں دے ایں دورے نال ڈوہائیں ملکاں وچال دو طرفہ تعلقات اچ ودھارا تھیسی ۔ وزیراعظم آکھیا جو ازبکستان دی شاندار سالانہ معاشی ترقی اتے توانائی دے بھرپور وسائل اتے پاکستان دی وسیع صنعتی اتے زرعی بنیاد ڈوہائیں ملکاں وچال تجارتی تعاون اچ ودھارے کیتے ہک مثالی ماحول ڈیندے ہئیں ۔ انہاں شوکت مرزی یویوف کوں جمہوریہ ازبکستان دا صدر منتخب تھیونڑ تے مبارخ ڈتی ۔ وزیراعظم آکھیا جو پاکستان دے ازبکستان نال قریبی، دوستانہ اتے برادرانہ تعلقات ہن اتے ڈوہائیں ملک سانجھی تریخی، مذہبی اتے ثقافتی گانڈھے اچ جڑیئے ہوئے ہن ۔ وزیراعظم آکھیا جو ڈوہائیں ملکاں کوں تجارت ، سرمایہ کاری، چیزاں دی آزادانہ نقل و حمل اتے خدمات اچ سہولتاں کیتے تجارتی پالیسیاں اچ مناسب اصلاحات گھن آونڑاں ہوسن۔ انہاں آکھیا جو ڈوہائیں ملکاں کوں خطے اچ خاص طور تے چائنا پاکستان اکنامک کوریڈور دے پیش نظر تجارتی صلاحت توں فیدہ چاونڑ کیتے سانجھی مربوط حکمت عملی اختیار کرنڑاں ہوسی ۔ ازبکستان دے نائب وزیراعظم نے وزیراعظم محمد نوازشریف کوں ازبک صدر ولوں ازبکستان دے دورے دی دعوت وی ڈتی جیکوں وزیراعظم قبول کرگھدا۔
